Tramp Netanyahunun məhkəməsinin ləğvini istəyib

ABŞ prezidenti Donald Tramp İsrailin baş naziri Benyamin Netanyahunun korrupsiya ilə bağlı davam edən məhkəmə prosesinin dərhal ləğvini və ya onun əfv edilməsini istəyib.

O, bu prosesi “cadugər ovu” adlandıraraq, Netanyahunun İsrail dövləti üçün böyük işlər gördüyünü bildirib və “böyük qəhrəman” kimi təqdim edib. Tramp, bu fikirlərini Truth sosial şəbəkəsində paylaşaraq, “İsraili xilas edən ABŞ idi, indi də Bibi Netanyahunu xilas edən ABŞ olacaq” deyə bəyan edib.

Netanyahuya qarşı üç cinayət işi irəli sürülüb və proses 2020-ci ildən davam edir. İddialara əsasən, rüşvət, dələduzluq və etimaddan sui-istifadə halları qeydə alınıb. O, bütün ittihamları rədd edir və özünü təqsirsiz sayır. Hazırda çarpaz dindirilmə mərhələsi Tel-Əvivdə başlayıb və prosesin bir il çəkəcəyi gözlənilir. İsrail prezidenti İsaak Hersoqun əfv səlahiyyəti olsa da, bu mövzu ilə bağlı rəsmi müraciət daxil olmayıb və əfv məsələsinin gündəmdə olmadığı qeyd olunub.

Al Jazeera
Qəmər Kazımzadə