Ulduzlara səyahət: Kosmik turizm və insanlığın gələcəyi

Son illərdə kosmik turizm təkcə elmi fantastika deyil, reallığa çevrilmək üzrədir. Ölkələr və şirkətlər kosmosa səyahət imkanları təqdim edir, Mars koloniyaları və kosmik yaşayış barədə layihələr gündəmə gəlir. Bu müsahibədə biz kosmik turizmin gələcək perspektivlərini, insan həyatına və cəmiyyətə təsirlərini, həmçinin kosmosda yaşayış imkanlarını müzakirə edəcəyik.

Mövzu ilə bağlı “İnformator.az”a açıqlamasında turizm eksperti Rəhman Quliyev bildirib ki, hazırda kosmik turizm çox məhdud çərçivədə-əsasən yüksək gəlirli şəxslər və texnologiya şirkətləri üçün mümkündür:

“SpaceX, Blue Origin və Virgin Galactic kimi şirkətlər artıq suborbital uçuşları həyata keçirir, lakin bu səyahətlərin qiyməti milyonlarla dollar təşkil edir. Texnologiyanın ucuzlaşması və kommersiya rəqabətinin artması ilə bu sahənin 2035–2040-cı illərdə daha geniş kütlələr üçün əlçatan olması gözlənilir. Əslində, bu proses aviasiyanın inkişaf mərhələsinə bənzəyir: bir vaxtlar təyyarə səyahəti də yalnız elita üçün idi, lakin bu gün gündəlik həyatın bir hissəsinə çevrilib.

Yəni yaxın gələcəkdə kosmik turizm “nadir lüks” olmaqdan çıxaraq, gələcəyin “ekzotik, amma real” turizm növünə çevriləcək. Elm baxımından Marsda yaşamaq ideyası artıq elmi fantastika deyil, konkret mühəndislik məqsədinə çevrilib. Lakin bu, hələ çox ciddi çətinliklərlə üz-üzədir: Marsda oksigen az, radiasiya yüksək, temperatur isə çox aşağıdır.

NASA və SpaceX kimi təşkilatlar Marsda daimi baza qurmaq üçün planlar hazırlayır. Elon Musk-ın proqnozlarına görə, 2050-ci illərə qədər Marsda ilk insan koloniyası yarana bilər. Ancaq bu, kütləvi köç deyil-ilkin mərhələdə kiçik elmi missiyalar və məhdud yaşayış məntəqələri nəzərdə tutulur. Kosmosda yaşamaq ideyası bəşəriyyətin birliyini simvolizə edir-çünki orada milli sərhədlər, siyasi ixtilaflar deyil, ümumi məqsəd-insanlığın varlığını qorumaq ön plandadır”.

Banuçiçək Məmmədova