Venesiya Film Festivalında İlon Mask haqqında 4 saatlıq sənədli film nümayiş olunub
Venesiya Film Festivalında məşhur sənədli film rejissoru Aleks Gibninin dünyanın ən varlı insanı İlon Mask haqqında hazırladığı yeni sənədli filmin premyerası baş tutub.
“Taxi to the Dark Side” və “Enron: The Smartest Guys in the Room” filmlərinin “Oskar” mükafatlı rejissoru Aleks Gibni daha əvvəl dünyanın ən varlı və nüfuzlu şəxsləri haqqında sənədli filmlər hazırlayıb. Lakin rejissorun yeni ekran işi miqyasına görə əvvəlkilərdən fərqlənir.
“Musk” adlı sənədli filmin müddəti 225 dəqiqədir. Ekran əsərinin nümayişi 10 dəqiqəlik fasilə ilə keçirilir və ümumilikdə təxminən 4 saat davam edir.
Filmdə Maskın həyatı və fəaliyyəti geniş şəkildə araşdırılır. Ekran əsərində onun texnologiya sahəsində fəaliyyəti, “SpaceX” şirkəti, “Twitter”in satın alınması və ABŞ administrasiyasında fəaliyyəti diqqət mərkəzinə gətirilir.
İlon Mask filmdə müsahibə verməyib
Aleks Gibni layihə üzərində işləyərkən İlon Maskdan müsahibə almağa çalışıb. Lakin Mask 2023-cü ilin martında sosial şəbəkədə filmi “qərəzli hücum” adlandırıb.
Bundan sonra rejissor filmdə Maskın süni intellekt vasitəsilə hazırlanmış avatarından istifadə edib. Avatar sahibkarın əvvəlki çıxışlarında səsləndirdiyi fikirləri təkrarlayır.
Devid Birn film üçün mahnı hazırlayıb
Musiqiçi Devid Birn filmin son titrləri üçün “Let Me Sell You a Dream” adlı mahnının hazırlanmasında iştirak edib. Mahnının sözləri Maskın əvvəlki çıxışlarında səsləndirdiyi ifadələrdən ibarətdir.
Filmdə Maskın Marsda şəhərlər salmaq və tam təhlükəsiz avtonom avtomobillər yaratmaq kimi vədləri də müzakirə olunur.
Astrofizik və yazıçı Adam Bekker Maskın Marsı koloniyalaşdırmaq planını tənqid edərək bunun ciddi fiziki maneələrlə üzləşdiyini bildirib.
Mask isə özünün gələcəyi proqnozlaşdırmaqda yaxşı olduğunu və söylədiklərinin gec də olsa reallaşacağını müdafiə edib.
Maskın Ağ Evdəki fəaliyyəti araşdırılıb
Sənədli filmdə İlon Maskın ABŞ hökumətindəki fəaliyyəti də geniş şəkildə təhlil olunur.
“Extremely Hardcore: Inside Elon Musk’s Twitter” kitabının müəllifi Zoi Şifferin sözlərinə görə, Mask “Twitter”i satın aldıqdan sonra şirkətdə apardığı kəskin dəyişikliklərə bənzər yanaşmanı ABŞ Prezidenti Donald Trampın administrasiyasında da tətbiq edib.
Şiffer Maskın Hökumət Effektivliyi Departamentinə (DOGE) rəhbərlik etdiyi dövrdə müxtəlif dövlət qurumlarının büdcələrinin azaldılmasına çalışdığını bildirib.
Mask isə sonradan DOGE-nin bir çox məsələyə görə “günah keçisinə” çevrildiyini deyib.
1937-ci ilin Britaniya filmi sənədli ekran əsərində istifadə olunub
Aleks Gibni Maskı təsvir etmək üçün 1937-ci ildə çəkilmiş “The Man Who Could Work Miracles” adlı Britaniya fantastik filmindən də kadrlardan istifadə edib.
H.Q. Uellsin əsəri əsasında çəkilən filmdə adi bir insan fövqəltəbii güclərə sahib olur. O, dünyadakı liderlərdən cəmiyyəti dərhal dəyişdirməyi tələb edir, lakin hadisələr nəticədə planetin məhvinə gətirib çıxarır.
Film Venesiyada müsbət qarşılanıb
Sənədli film Venesiya Film Festivalındakı premyerasından sonra əsasən müsbət rəylər alıb.
“Variety” ekran əsərini mühüm və təsirli film kimi qiymətləndirib. “The Telegraph” isə filmi dörd ulduzla dəyərləndirərək onu “soyuqqanlı şəkildə araşdırılmış” ekran əsəri adlandırıb.
İlon Mask isə filmin tərəfdarları arasında olmayıb. O, “X” sosial şəbəkəsində ekran əsərini “hədəfə dəyməyən hücum” kimi xarakterizə edib və filmin 4 saat ərzində darıxdırıcı olduğunu bildirib.
Güllər Gülhüseynova
