Vətən müharibəsi qəhrəmanı

Azərbaycanın azadlığı uğrunda canından keçən igidlərin hər biri Vətən tarixinin qürur səhifəsi olub. Onlardan biri də gənc yaşında şəhidlik zirvəsinə yüksələn Raul Zabid oğlu Piriyev olub.

Raul Piriyev 4 iyun 1997-ci ildə Şəmkir rayonunun Kür qəsəbəsində dünyaya göz açıb. Uşaqlıqdan zəhmətsevər, mehriban və xeyirxah xarakteri ilə tanınıb. O, 2015-ci ildə orta məktəbi bitirdikdən sonra Azərbaycan Dövlət Texniki Universitetinin Dəmir Yol Nəqliyyatı və Təsərrüfatı mühəndisliyi fakültəsinə daxil olub, təhsildə və ictimai fəaliyyətdə fərqlənib.

Ali təhsilini başa vurduqdan sonra Raul vətənə borcunu ödəmək üçün hərbi xidmətə yollanıb, xidmətini fədakarlıqla yerinə yetirib. 2020-ci ilin sentyabrında başlayan Vətən müharibəsi zamanı o, bir an belə tərəddüd etmədən döyüşə könüllü qatılıb. Murovdağ, Füzuli və Cəbrayıl istiqamətlərində gedən ən ağır döyüşlərdə iştirak edib, yoldaşlarının təhlükəsizliyini hər şeydən üstün tutub.

Raul 5 oktyabr 2020-ci ildə Cəbrayıl rayonu ərazisində döyüş tapşırığını yerinə yetirərkən qəhrəmancasına şəhid olub. O, ölümündə belə mərdlik və vətənpərvərlik nümunəsi göstərib.

Şəhidin fədakar xidməti dövlət tərəfindən yüksək qiymətləndirilmişdir. Raul Piriyev ölümündən sonra “Cəsur döyüşçü”, “Vətən müharibəsi iştirakçısı” və “Cəbrayılın azad olunmasına görə” medalları ilə təltif edilib.

Raul Piriyevin xatirəsi bu gün də doğulduğu torpaqda, Kür qəsəbəsində ehtiramla yad edilib. Onun hekayəsi bir gəncin taleyindəki böyük məna kimi oxunub: Vətən üçün yaşamaq, Vətən üçün ölmək-ən böyük şərəfdir.

Banuçiçək Məmmədova