Bəzi səslər var ki, zamanın fövqündə dayanır. İllər keçir, nəsillər dəyişir, lakin o səsin ruhumuza toxunduğu an bəşəriyyətin ən doğma hissləri yenidən oyanır. Bu sənətkarların sırasında görkəmli xanəndə, Xalq artisti Şövkət Ələkbərova xüsusi yer tutur. 

1922-ci ildə Bakıda dünyaya göz açan Şövkət Ələkbərovanın musiqiyə sevgisi hələ uşaqlıq illərindən formalaşıb. Asəf Zeynallı adına Musiqi Məktəbində təhsil alan sənətkarın istedadı qısa zamanda dövrün böyük musiqi xadimlərinin diqqətini cəlb edib. Onun peşəkar səhnə fəaliyyətinin başlanğıcı isə Azərbaycan musiqisinin banilərindən olan Üzeyir Hacıbəylinin dəstəyi ilə olub. 

Sənətkarın ifasında məşhurlaşan “Qaragilə”, “Sarı gəlin”, “Ay bəri bax”, “Küçələrə su səpmişəm”, “Laçın” kimi xalq mahnıları Azərbaycan musiqisinin qızıl fonduna daxil olub. Xanəndənin muğam ifaçılığı da xüsusi diqqətə layiqdir. O, “Segah”, “Şur”, “Bayatı-Şiraz” və “Qarabağ şikəstəsi” kimi muğamları böyük ustalıqla təqdim edərək bu sənətin yaşadılmasına və inkişafına mühüm töhfə verib.

Şövkət Ələkbərovanın ifaları xalqın sevincinin, kədərinin, həsrətinin və ümidlərinin səsə çevrilmiş ifadəsidir. Xüsusilə “Qarabağ şikəstəsi” kimi muğamların ifasında nümayiş etdirdiyi ustalıq onu Azərbaycan musiqisinin əfsanələri sırasına yüksəldib.

Onun sənəti Azərbaycanın sərhədlərini də aşaraq dünyanın müxtəlif ölkələrində böyük rəğbətlə qarşılanıb. Şövkət Ələkbərova təkcə Azərbaycanın deyil, Şərq musiqisinin də tanınmış simalarından birinə çevrilib. Müxtəlif ölkələrdə verdiyi konsertlərdə Azərbaycan musiqisini uğurla təmsil edən sənətkar milli mədəniyyətimizin dünyada tanınmasına mühüm töhfələr verib. 

Şövkət Ələkbərovanın sənət yolu həm də iradənin, sədaqətin və peşəkarlığın nümunəsidir. O, həyatının çətin anlarında belə sənətdən uzaqlaşmayaraq səhnəyə və tamaşaçı sevgisinə sığınıb.

Zaman dəyişir, musiqi zövqləri yenilənir, lakin bəzi səslər heç vaxt köhnəlmir. Şövkət Ələkbərovanın səsi də belə səslərdəndir. O səs Azərbaycan musiqisinin ruhunu, milli kimliyini və zəngin mədəniyyətini gələcək nəsillərə çatdıran əvəzsiz bir xəzinədir.

Zəri Bayramlı