XIX əsrdən qalan əşyalar
Bukingem sarayında aparılan bərpa işləri zamanı XIX əsrə və sonrakı dövrlərə aid çoxsaylı gündəlik əşyalar aşkar edilib.
Köhnə və mismarlı çəkmələr, onilliklər əvvələ aid qəzet parçaları və digər əşyalar sarayda həyata keçirilən genişmiqyaslı təmir-bərpa işləri zamanı üzə çıxıb.
Tapılan əşyaların vaxtilə Bukingem sarayında çalışan əməkdaşlara məxsus olduğu ehtimal edilir. Onlar 369 milyon funt sterlinq dəyərində həyata keçirilən yenidənqurma işləri çərçivəsində çalışan işçilər tərəfindən aşkarlanıb.
Tapıntılar arasında 14 aprel 1949-cu ildə sarayda keçirilən və kart oyunu tədbiri olan “whist drive” üçün bilet də var. Biletin bir kərpic parçasının içərisində olduğu bildirilib.
Bundan başqa, döşəməaltından bir neçə mərc kuponu, “Schweppes Still Malvern English Spring Water” markalı su şüşəsi, boş “Silk Cut” siqaret qutusu və 1963-cü ildə baş verən Böyük Qatar Soyğununda iştirak edən dəstənin həbs edilməsindən bəhs edən qəzet məqaləsi də tapılıb.
Londondakı kral iqamətgahında 10 illik yenidənqurma proqramı həyata keçirilir. Müvəqqəti olaraq artırılmış “Sovereign Grant” – kral ailəsinin rəsmi fəaliyyətinin maliyyələşdirilməsi üçün ayrılan vəsait hesabına maliyyələşdirilən layihənin mart ayında başa çatdırılması nəzərdə tutulur.
Bərpa işləri çərçivəsində sarayın köhnəlmiş kabelləri, qurğuşun boruları, elektrik naqilləri və qazanları yenilənir. Onların bir qisminin təxminən 60 ildir dəyişdirilmədiyi bildirilir. Yenilənmə zərurəti binada mümkün yanğın və su sızması riskləri ilə əlaqədar yaranıb.
İndiyədək həmin əşyaların əksəriyyəti binanın konstruksiyaları və infrastrukturu arasında gizli qalıb.
Aşkarlanan tapıntılar sırasında Kraliça II Elizabetin 1977-ci ildə – hakimiyyətinin 25 illiyi münasibətilə keçirilən Gümüş yubiley ili çərçivəsində təşkil etdiyi diplomatik qəbulun proqramı da var.
Maşında yazılmış sənəddə monarxın qəbul zamanı qonaqlarla “saat istiqamətində” görüşəcəyi qeyd olunub. Həmçinin sarayın əməkdaşlarından 350 britaniyalı qonağın diplomatlarla ünsiyyət qurmasına şərait yaratmaları istənilib.
Sənəddə britaniyalı qonaqların Musiqi otağı və Qərb qalereyası istisna olmaqla, Dövlət otaqları boyunca yerləşdirilməsinin və diplomatlarla söhbət etməyə təşviq olunmasının nəzərdə tutulduğu bildirilib.
Tapıntılar arasında 1957-ci ilə aid boş “Littlewoods Football Pool” mərc kuponları, “The Standard” qəzetinin 1889-cu il buraxılışından Qərbi End teatrlarının repertuarını əks etdirən bir parça da yer alıb.
Bununla yanaşı, XIX əsrin ortalarına aid olduğu düşünülən “Minton” markalı dekorativ keramik plitələrin fraqmentləri, qalaydan hazırlanmış pivə qabı, taxta birləşdirici qutu və içərisində altı Milad kartı olan solğun rəngli qutu da aşkar edilib.
Bərpa işləri zamanı vulkanlaşdırılmış Hindistan rezini ilə örtülmüş elektrik kabelləri də tapılıb. Bu kabellərin bina üçün ən böyük yanğın təhlükəsi yaratdığı üçün yenidənqurma işlərinə başlanılan kimi ilk növbədə dəyişdirildiyi qeyd olunur.
Həmçinin 1966-cı il tarixli “Daily Express” qəzetinin Böyük Qatar Soyğununda iştirak edən şəxslərin saxlanıldığı “maksimum təhlükəsizlikli” həbsxanadan bəhs edən səhifələri də üzə çıxıb.
Məqalədə Durham həbsxanasının fotoları dərc olunub və poçt kisələrindəki böyük məbləğdə pulu oğurlamaqda təqsirli bilinən şəxslərin həftə ərzində kisə tikməklə məşğul olduqları yazılıb.
Qiyməti 6 pens olan “whist drive” bileti isə Kral III Çarlzın babası VI Corcun hakimiyyəti dövründə keçirilməli idi. Tədbirin Bukingem sarayının sosial klubunun təşkil etdiyi bildirilir.
Elmira Ağayeva
