Xoruldama düşündüyünüzdən daha ciddi problem ola bilər

Xoruldama kifayət qədər geniş yayılmış problemdir. Böyük Britaniyada insanların təxminən 40%-nin xoruldadığı bildirilir. ABŞ-də aparılan sorğuya görə isə xoruldayan partnyoru olan insanların 75%-i yuxularının bu səbəbdən pozulduğunu deyib.

Yuxu zamanı xorultu səbəbindən tez-tez oyanmaq insanın dərin və bərpaedici yuxu mərhələlərində keçirdiyi vaxtı azalda bilər. Bu isə səhər saatlarında yorğunluq, diqqət dağınıqlığı və yaddaş problemləri ilə nəticələnə bilər.

Mütəxəssislərin sözlərinə görə, yuxu beynin gün ərzində əldə etdiyi məlumatları emal edib yaddaşda saxlaması üçün də vacibdir. Yuxunun dəfələrlə bölünməsi bu prosesi poza bilər.

Xoruldama hansı halda təhlükə siqnalıdır?

Əgər insan yatarkən nəfəsi dayanır və yenidən başlayırsa, gecə boğulurmuş kimi oyanırsa, tez-tez yuxudan ayılırsa və ya səhərlər baş ağrısı ilə oyanırsa, həkimə müraciət etmək tövsiyə olunur.

Yuxu apnesinin müalicəsində vəziyyətdən asılı olaraq CPAP aparatından və ya digər müalicə üsullarından istifadə edilə bilər.

Sadə xoruldama zamanı isə bəzi həyat tərzi dəyişiklikləri kömək edə bilər. Çəki azaltmaq, siqaretdən uzaq durmaq, yatmazdan əvvəl spirtli içki qəbul etməmək və arxası üstə deyil, böyrü üstə yatmaq xoruldamanı azaltmağa kömək edə bilər.

Mütəxəssislər həmçinin uzun müddət xoruldama probleminə dözmək əvəzinə, səbəbini müəyyənləşdirmək üçün həkimə müraciət etməyi tövsiyə edirlər.