Zərifliyin və xeyirxahlığın simvolu olan aktrisa: Audrey Hepburn
Bəzi insanlar təkcə oynadıqları rollarla deyil, həyat tərzləri və insanlara münasibətləri ilə də tarixə düşürlər. Audrey Hepburn məhz belə şəxsiyyətlərdən idi. O, Hollivudun ən məşhur aktrisalarından biri olmaqla yanaşı, zərifliyin, sadəliyin və mərhəmətin simvoluna çevrilmişdi.
Audrey Hepburn 4 may 1929-cu ildə Belçikanın Brüssel şəhərində anadan olub. Uşaqlıq illəri İkinci Dünya müharibəsinin ağır dövrünə təsadüf edib. Müharibə zamanı aclıq və çətinliklərlə üzləşən Hepburn sonralar bu günlərin onun həyata baxışını tamamilə dəyişdiyini deyirdi. Məhz həmin çətin uşaqlıq illəri onda insanlara kömək etmək istəyini formalaşdırmışdı.
Əslində Audrey balerina olmaq arzusunda idi. Müharibədən sonra balet təhsili alsa da, səhhəti buna imkan vermədi. O, daha sonra aktyorluğa üz tutdu və qısa müddətdə diqqət çəkməyi bacardı.
1953-cü ildə ekranlara çıxan “Roman Holiday” filmi Audrey Hepburnun həyatını dəyişdi. O, bu filmdə şahzadə Ann obrazını canlandırdı və ilk baş roluna görə “Oskar” mükafatını qazandı. Bu uğurdan sonra “Sabrina”, “Funny Face”, “Breakfast at Tiffany’s”, “My Fair Lady” və “Charade” kimi filmlərlə dünya kinosunun əfsanəsinə çevrildi.
Xüsusilə “Breakfast at Tiffany’s” filmində yaratdığı Holli Qolaytli obrazı kino tarixinin ən yaddaqalan personajlarından biri hesab olunur. Qara libası, uzun əlcəkləri və zərif görünüşü bu gün də moda dünyasının ilham mənbələrindən biridir.
Lakin Audrey Hepburnu digərlərindən fərqləndirən təkcə istedadı deyildi. O, şöhrətini heç vaxt dəbdəbəli həyat üçün istifadə etmədi. Karyerasının son illərində diqqətini tamamilə xeyriyyəçiliyə yönəltdi.
1988-ci ildə UNICEF-in xoşməramlı səfiri təyin olunan aktrisa Afrika, Asiya və Latın Amerikasının ən kasıb bölgələrinə səfərlər etdi. Efiopiya, Somali, Sudan, Banqladeş və Vyetnamda aclıq, xəstəlik və müharibədən əziyyət çəkən uşaqlarla görüşərək onların problemlərini dünyanın diqqətinə çatdırdı. O deyirdi:
“Uşaqlara qayğı göstərmək siyasət deyil. Bu, insanlıqdır.”
Audrey Hepburn həyatının sonuna qədər humanitar fəaliyyətini davam etdirdi. 20 yanvar 1993-cü ildə, 63 yaşında İsveçrədə vəfat etdi.
Bu gün Audrey Hepburn yalnız Hollivud ulduzu kimi deyil, həm də insanlara sevgisi, təvazökarlığı və xeyirxahlığı ilə xatırlanır. Onun filmləri illər keçsə də dəyərini itirmir, həyatı isə göstərir ki, əsl gözəllik insanın xarici görünüşündə deyil, ürəyində və əməllərindədir.
Audrey Hepburn haqqında danışarkən ilk yada düşən sözlərdən biri zəriflikdir. Amma onu əsl əfsanəyə çevirən gözəlliyi deyil, milyonlarla insanın həyatına toxunan mərhəməti idi.
Elmira Ağayeva
