Şirməmməd Hüseynovdan öyrəndiklərim hər zaman köməyimə gəlir...

Bölmə: MEDİA › ,
Tarix: 23:49 17.12.2024

Hər bir insan həyatında onu doğru yolla aparan, öz yolunu tapmasına kömək edən, həmçinin həyatına dərin mənalar qataraq inkişaf etməsinə dəstək olan bir şəxsiyyətə rast gəlir. Bizim üçün o şəxsiyyət, Şirməmməd müəllim idi. Dərs dediyi hər kəsin həyatına iz buraxan, yalnız akademik biliklərlə deyil, insanlıqla da örnək olan bu nadir insanın tələbəsi olmaq, onun yolundan getmək böyük bir şərəfdir. 

 

BDU-nun Milli mətbuat tarixi kafedrasının müəllimi Samir Xalidoğlu İnformator.az-a Şirməmməd müəllimin həyatında, elmi fəaliyyətində və müəllimlik yolunda qoyduğu izlərdən danışıb:

 

"Şirməmməd müəllim dərs deyib-deməməyindən asılı olmayaraq hər bir kəsin özünə müəllim hesab etdiyi nadir şəxsiyyətlərdən biridir. Lakin mən özümü xoşbəxt hiss edirəm ki, məhz Şirməmməd müəllimin dərs dediyi tələbələrdənəm. Şirməmməd müəllimdən həm bakalavr, həm də magistratura pilləsində dərs aldım. Şirməmməd müəllim mənim yol göstərənimdir. Bu gün mən müəllim kimi fəaliyyət göstərirəmsə, müəyyən qədər nailiyyət, uğur əldə edə bilirəmsə, bunu ilk növbədə Şirməmməd müəllimə borcluyam. Çünki bu işin incəliklərini məhz ondan öyrəndim. Elmə, tədqiqatçılıq işinə həvəsi o məndə yaradıb. Şirməmməd müəllim mənim həm bakalavriat, həm magistratura, həm də dokturantura səviyyələrində elmi rəhbərim olub". 

Samir Xalidoğlu ondan öyrəndiklərinin hər zaman köməyinə gəldiyini söyləyib:

 

"Şirməmməd müəllim bizim hamımızın müəllimidir, ustad deyə biləcəyimiz şəxsiyyətlərdəndir. Nə yaxşı ki, mən Şirməmməd müəllimdən dərs alıb, onun tələbəsi olmuşam".

 

Banuçiçək Kalbalıyeva