Orkinos hərracda 1 milyon dollardan çox qiymətə satıldı
Bölmə: Maraqlı ›
,
Tarix: 16:00 06.01.2025
Motosiklet böyüklüyündə olan mavi orkinos Yaponiyanın ən nüfuzlu balıq bazarında 1,3 milyon dollara (207 milyon yen) satılıb. Bu, yeni il hərracında rekord qiymətə yaxın ikinci ən yüksək göstərici olub.
Michelin ulduzlu suşi restoranlarının sahibləri olan Onodera Qrupu, yanvarın 5-də Tokiodakı Toyosu balıq bazarında keçirilən hərracda 608 funt (276 kiloqram) çəkidə olan balığı 1 milyon dollarlıq təkliflə alıb.
Kyodo agentliyinə görə, bu təklif, dünyanın ən böyük dəniz məhsulları topdansatış bazarlarından biri olan bu bazarda məlumatların 1999-cu ildən toplanmağa başlanmasından bəri ikinci ən yüksək qiymət olub. Rekord isə 2019-cu ildə 278 kiloqramlıq orkinos üçün 3,1 milyon dollar (333,6 milyon yen) təklif edilmişdi.
Həftənin əksər səhərlərində ölkənin hər yerindən olan satıcılar bazara ən yaxşı balıq ovlarını hərraca çıxarır. Lakin nüfuzlu yeni il hərracı alıcılar üçün xüsusi əhəmiyyət kəsb edir, çünki onlar ilin ilk partiyasını əldə etmək şərəfi uğrunda yarışırlar.
"İlin ilk orkinosu uğur gətirir. Biz insanlara yeməklə təbəssüm bəxş etmək istəyirik",-deyə Kyodonun sitat gətirdiyi Sushi Onodera-nın prezidenti Şinci Naqao bildirib.
Bu qrup, Tokioda və Los-Ancelesdə restoranları olan Michelin ulduzlu Sushi Ginza Onodera şəbəkəsinin arxasında dayanır.
Onodera Qrupu ardıcıl olaraq beşinci ildir ki, ən yüksək qiyməti ödəyib. Ötən il də həmin hərracda 720 min dollardan (114,2 milyon yen) çox ödəyərək mavi orkinos almışdı, bu barədə Sushi Ginza Onodera-nın vebsaytında məlumat verilib.
Onların sonuncu qəniməti Kyodoya görə Aomori prefekturasının şimal-şərq sahillərində, Oma bölgəsində ovlanıb.
Balıqçı Masahiro Takeuçi Yapon mediasına öz sevincini belə ifadə edib: "İnanılmaz dərəcədə xoşbəxtəm".
Mənbə: CNN
Nuray Qurbanlı
