ABŞ–İran nüvə danışıqlarının dördüncü raundu təxirə salınıb –-gərginlik davam edir

Bölmə: Siyasət › ,
Tarix: 22:22 01.05.2025

Omanın xarici işlər naziri Bədr bin Həməd əl-Busaidi ABŞ ilə İran arasında nəzərdə tutulan növbəti nüvə danışıqlarının təxirə salındığını elan edib. Bu barədə nazir cümə axşamı, sosial media platforması “X” üzərindən açıqlama verib. Danışıqların mayın 3-də Romada başlaması planlaşdırılırdı.

 

“Danışıqlar ilkin olaraq şənbə günü, 3 may tarixində keçirilməli idi. Yeni tarixlər qarşılıqlı razılıq əsasında açıqlanacaq,” – deyə əl-Busaidi bildirib.

 

Qeyd edək ki, Omanın vasitəçiliyi ilə ABŞ və İran arasında daha əvvəl üç raund danışıqlar keçirilib. İlk görüş 12 aprel tarixində Omanın paytaxtı Müsqatda baş tutub. Növbəti görüş isə həmin ayın sonunda Romada təşkil olunub. Üçüncü raund isə 26 aprel tarixində yenidən Müsqata qaytarılıb və ABŞ tərəfi bu mərhələdə “irəliləyiş əldə olunduğunu” açıqlayıb.

 

Bununla belə, tərəflər arasında davam edən siyasi gərginlik danışıqlar prosesinə öz mənfi təsirini göstərməkdədir. ABŞ-ın keçmiş prezidenti Donald Trampın administrasiyası İranın nüvə silahı istehsal etməsinin qarşısını almağı əsas məqsəd kimi göstərsə də, Tehran nüvə proqramını mülki enerji layihəsi kimi təqdim edir və silahlanma niyyətini təkzib edir.

 

Tramp dövründə Vaşinqton daha irəli gedərək İranın uran zənginləşdirmə proqramının tamamilə ləğvini də hədəf seçib. ABŞ-ın xüsusi elçisi Stiv Vitkof aprel ayının ortalarında verdiyi bəyanatda qeyd edib ki, yekun razılaşma çərçivəsində “İran nüvə zənginləşdirmə və silahlanma fəaliyyətlərini dayandırmalı və ləğv etməlidir.”

 

Təxirəsalma xəbəri elan edilməzdən əvvəl, cümə axşamı İran ABŞ-ı “ziddiyyətli davranışlar və təhrikedici bəyanatlarla” danışıqlar prosesini pozmaqda ittiham edib.

 

Çərşənbə günü isə ABŞ tərəfi İranın üzərinə əlavə təzyiq göstərmək üçün bir sıra yeni addımlar atıb. Dövlət Departamenti İran neft məhsulları ilə ticarət edən yeddi quruma sanksiya tətbiq edib. Açıqlamada bildirilib ki, bu gəlirlər “İranın terrorçuluq fəaliyyəti və proksi qruplarını dəstəkləmək üçün istifadə olunur.”

 

Eyni gün ABŞ Müdafiə naziri Pit Hegset də çıxış edərək, İranın Yəməndə fəaliyyət göstərən silahlı Husi qruplaşmasına dəstəyinin ABŞ tərəfindən cavab tədbirləri ilə nəticələnə biləcəyini vurğulayıb.

 

Mənbə: Al Jazeera
Türkan Kərimli