Abituriyentlərin nəzərinə! -Keçid balları enəcək?

Bölmə: Sosial › ,
Tarix: 15:53 15.02.2024

2024-cü ildə keçirilməsi nəzərdə tutulan ali təhsil müəssisələrinin bakalavriat səviyyəsinə qəbul imtahanları, sənəd qəbulu tarixləri, magistraturaya qəbul imtahanının II cəhdi, rezidenturaya qəbul, dövlət qulluğuna qəbul, eləcə də digər imtahan və tədbrilərin tarixləri müəyyən olunub.

İnformator.az xəbər verir ki, bu barədə Dövlət İmtahan Mərkəzi məlumat verib.
2024-cü ildə ali təhsil müəssisələrinə qəbul imtahanlarının birinci cəhdi II və III ixtisas qrupları üzrə mayın 26-da, I və IV ixtisas qrupları üzrə iyunun 2-də keçiriləcək.

II və III ixtisas qrupları üzrə qəbul imtahanların ikinci cəhdi iyulun 7-də, I və IV ixtisas qrupları üzrə iyulun 14-də keçiriləcək.

 

Hər il olduğu kimi bu il də keçid ballarında enmənin müşahidə olunub-olunmayacağı, plan yerlərinin sayı, qruplar üzrə keçid balları maraq mövzusudur.

Xatırladaq ki, ötən il keçid ballarında ciddi enmələr müşahidə olundu. Məsələn: 2022-ci ildə Dövlət Gömrük Komitəsi Akademiyası - İnformasiya Təhlükəsizliyi ixtisasının keçid balı  583 olsa da, 2023-cü ildə bu 200 bal oldu.

 

 

Bəs bu il keçid ballarıyla bağlı nələr gözlənilir?

 

Təhsil eksperti Cahid İmanlı İnformator.az- a açıqlaması zamanı qeyd edir ki, bu il Qarabağ Universitetinin açılması həm plan yerlərinin artımına səbəb olacaq, həm də ballarda enmə müşahidə ediləcək.

 

"Belə ki, Universitetin Nizamnaməsinə görə, bu il üçün hələki bu universitetə qəbul ödənişsiz əsaslarla aparılacaq və   qəbul planı da 1000-ə qədər olacaq".

 

Cahid İmanlı bildirir ki, qruplar üzrə I və III qruplarda enmə daha çox gözləniləndir.

 

"Amma qrup daxilində də  ixtisaslar üzrə ballarda dəyişiklik olacağı labüddür. Belə ki,  süni intellektli tərcümə proqramlarının tətbiqi nəticəsində III qrupda "Tərcümə" ixtisaslarının ballarının enəcəyi, bu qrupda olan tərcümə ixtisası ilə eyni səviyyəli digər ixtisaslarınsa ballarının qalxacağını əminliklə demək olar".

 

Qeyd edək ki, ərizə qəbulunun 2-ci mərhələsi, yəni I, II, III və IV ixtisas qrupları üzrə qəbul imtahanının II mərhələsinin 1-ci cəhdində iştirak etmək istəyənlər aprelin 15-dən mayın 6-dək imtahan vermək istədikləri ixtisas qrupunu seçərək qeydiyyatdan keçəcəklər. I, II, III və IV ixtisas qrupları üzrə qəbul imtahanının II mərhələsinin 2-ci cəhdində iştirak etmək üçün qeydiyyat isə mayın 31-dən iyunun 17-dək olan müddətdə aparılacaq.


Nəzrin Mirzəyeva