Bedfordşirdən olan iki uşaq atası Rhys Hibbert əməliyyat olunmasaydı, görmə qabiliyyətini itirə bilərdi. Bunu University College London Hospital-ın cərrahları bildiriblər.

Süni intellekt aləti əməliyyat zamanı çəkilən görüntüləri real vaxtda analiz edib və cərrahlara beyində görünməyən, lakin çox vacib olan damar və sinirlərdən necə yayınmaq barədə məlumat verib. Bu texnologiya həkimlərə şişin mümkün qədər böyük hissəsini təhlükəsiz şəkildə çıxarmağa imkan yaradıb.

Hibbert deyib ki, xəstənin təhlükəsizliyi baxımından bu texnologiyanın faydasını açıq şəkildə görür. O, bunu belə ifadə edib: “Başımızın içində yol nişanları yoxdur".

48 yaşlı Hibbert təxminən 18 ay əvvələ qədər özünü sağlam və yaxşı hiss edirdi. O, hər gün nahar vaxtı təxminən 3,2 kilometr piyada gəzirdi.

Belə gəzintilərdən birində o, qəfil huşunu itirib və yolda qıcolma keçirib.

Beyin müayinəsi nəticəsində onun hipofiz vəzində 11 millimetr ölçüsündə, xərçəng olmayan şiş olduğu müəyyən edilib. Hipofiz kəllənin dibində yerləşən və təxminən mərmər ölçüsündə olan orqandır.

Bu vəz böyümə, maddələr mübadiləsi, qan təzyiqi və bədən temperaturunun tənzimlənməsi kimi vacib proseslərə kömək edən hormonlar ifraz edir.

Ən mühüm məqam isə odur ki, hipofiz beyinə qan aparan yuxu arteriyalarına (karotid arteriyalara) və görməyə nəzarət edən optik sinirlərə çox yaxın yerləşir.

Hibbertin şişi böyüdükcə optik sinirlərə təzyiq göstərməyə başlayıb və nəticədə onun periferik, yəni kənar görmə sahəsi daralıb.

Nurgün Qənizadə