Azərbaycan Könüllülük Həftəsi”nin yekunları ilə bağlı tədbir keçirilib

Bölmə: Sosial › ,
Tarix: 20:18 16.12.2024

Dekabrın 16-da, "Yaşıl Dünya" naminə könüllülərə həsr olunmuş "Azərbaycan Könüllü Həftəsi"nin yekunları ilə bağlı Bakı Dövlət Universitetinin "Hekayəti Müsyö Jordan həkimi-nəbatat və dərviş Məstəli Şah cadüküni" tamaşası səhnəyə qoyulub. Tədbirdə "Asan Xidmət", " Bir Könüllü", "Miqrasiya könüllüsü", "Könüllü gömrükçü" və digər fəal könüllülər iştirak edib.

 

Açılış nitqi ilə çıxış edən Bakı Dövlət Universitetinin sosial məsələlər, tələbələrlə iş və ictimaiyyətlə əlaqələr üzrə prorektor Əliş Çoban oğlu Ağamirzəyev bildirib ki, Azərbaycan könüllüləri hər zaman cəmiyyətdə fəal iştirak edir.

Tədbirin gedişində Azərbaycan Könüllü Təşkilatları İttifaqının yeni sədri Vüqar Əliyev, "Azərbaycan Könüllü Həftəsi" zamanı keçirilən tədbirlərdə Bakı Dövlət Universitetinin könüllülərinin daha aktiv olduğunu vurğulayıb:

 

"Azərbaycan Könüllü Həftəsi çərçivəsində 23 tədbir həyata keçirdik. Bu tədbirlərdə könüllülər izləyici yox, iştirakçı oldular. Bakı Dövlət Universitetinin könüllüləri ən çətin anlarda da dövlətin və ölkənin yanında oldular.Nümunə olaraq COP 29-a Bakı Dövlət Universitetinin (BDU) könüllüləri fəal şəkildə qatılıb. Onlar tədbirin təşkilində və iştirakçılara dəstək göstərməkdə önəmli rol oynayıblar. BDU-nun könüllüləri, beynəlxalq səviyyədə keçirilən bu cür mühüm tədbirlərdə öz fəallıqları və təşkilati bacarıqları ilə diqqət çəkiblər. Onlar, həmçinin COP 29-un məqsədləri və mövzularına dair məlumatlandırma işləri aparıb, qonaqlara və iştirakçılara müxtəlif xidmətlər təqdim ediblər. Bu cür tədbirlərdə iştirak etmək, onların sosial məsuliyyət və liderlik bacarıqlarını inkişaf etdirmək üçün yaxşı bir fürsət olub".

 

Tədbir sonunda, “Azərbaycan Könüllü Həftəsi”nin yekunları ilə bağlı keçirilən tamaşa iştirakçılarda dərin təəssüratlar yaratdı. "Hekayəti Müsyö Jordan həkimi-nəbatat və dərviş Məstəli Şah cadüküni" tamaşası, könüllülük fəaliyyətlərinin və cəmiyyətə xidmətin nə qədər vacib olduğunu bir daha vurğuladı. Bu tədbir, həmçinin, gələcəkdə könüllülərin aktivliyinin artacağına və daha çox insanın bu fəaliyyətdə iştirak edəcəyinə olan inamı gücləndirdi.

 

Nərgiz Orucova