Beynəlxalq Uşaq Kitabı Günü

Bölmə: Sosial › ,
Tarix: 19:17 02.04.2025

2 aprel Beynəlxalq Uşaq Kitabı Günü kimi qeyd olunur. Kitablar hər yaş kateqoriyasında olan insanlara təsir etdiyi kimi, uşaqlara da böyük təsir göstərir.

Mövzu ilə bağlı mütəxəssis Sərxan Rüstəmov "informator.az"a açıqlamasında bildirib ki, kitabların uşaqların inkişafında rolu əvəzsizdir, bunu araşdırmalar da göstərir:

 

"Uşaqların nəinki kitab oxuması, hətta kitab olan mühitdə böyüməsi çox böyük əhəmiyyətə malikdir. Bu uşaqlarla kitab olmayan mühitdə böyüyən uşaqlar arasında çox böyük fərqlər var. Bir də düşünün ki, kitab oxuyaraq böyüyən uşaqlar necə formalaşırlar. Kitablar ümumilikdə, uşaqların söz ehtiyatını artırılmasında, xəyal dünyasını genişləndirilməsində, nitq qabiliyyətinin yaxşılaşdırılmasında və s. böyük rol oynayır. Valideynlər mənə sual verirlər uşağı necə kitaba cəlb edək? Əslində uşağı kitab oxumağa cəlb etməyə ehtiyac yoxdur. Biz özümüzü kitab oxumağa cəlb etməliyik. Valideynlər, pedaqoqlar, böyüklər kitab oxusalar, uşaq da kitab oxuyacaq. Çünki uşaqlar gördüklərini təkrar edirlər. Valideynlərə tövsiyə edirəm ki, uşaqlar üçün kitab alarkən, öncə özləri kitabla maraqlansınlar, oxusunlar. Çünki burada kitabın kateqoriyası, uşağın yaşı və psixologiyası önəmlidir.

 

Son illərdə çoxlu sayda tərcümə və yerli yazarların kitabları nəşr olunub. Azərbaycan ədəbiyyatında klassiklərdən Mirzə Ələkbər Sabir, Cəlil Məmmədquluzadə, Nizami Gəncəvi, İsmayıl Şıxlı, müasirlərdən Mürşid İsmayılzadə, Reyhan Yusifqızı, Aysel Şıxlı, Sevinc Nuruqızı, Zahid Xəlil, Ramiz Rövşən kimi şairlərin, yazıçıların uşaqlarla bağlı əsərləri, kitabları kifayət qədərdir. Yetər ki, biz oxumaq istəyək, uşaqlara kitabları sevdirmək istəyək".

Billurə Quliyeva