Ad, ata adı və soyadın dəyişdirilməsi -Hüquqşünas AÇIQLAYIR

Bölmə: Sosial › ,
Tarix: 17:08 03.04.2025

“Azərbaycan Respublikası Nazirlər Kabinetinin 2011-ci il 12 may tarixli 79 nömrəli qərarı ilə təsdiq edilən “Adın, ata adının və soyadın verilməsi və dəyişdirilməsi Qaydaları"na əsasən vətəndaşların öz adını, ata adını və soyadını dəyişdirməsinə 18 yaşına çatdıqdan sonra yol verilir”.

 

Bu sözləri hüquqşünas Günay Abbasova “İnformator.az”a açıqlamasında deyib.

Müsahibimiz qeyd edib ki, adın, ata adının və soyadın dəyişdirilməsi qeydiyyat şöbəsi və ya konsulluq idarəsi vasitəsilə həyata keçirilir:

 

“Adın, ata adının və soyadın dəyişdirilməsi haqqında ərizə vətəndaşın seçdiyi yer üzrə qeydiyyat şöbəsinə, xarici ölkədə daimi və ya il ərzində 182 gündən artıq müvəqqəti yaşayan Azərbaycan Respublikasının vətəndaşı vasitəsilə isə konsulluq idarəsinə verilir. Bu zaman müraciət edən şəxs öz ərizəsində cari soyadı, adı və atasının adını, habelə adını, ata adını və ya soyadını dəyişdirmək istəyi və daşımaq istədiyi ad, ata adı və soyadı qeyd etməlidir. Adın, ata adının və soyadın dəyişdirilməsi məqsədilə müraciət edən şəxslər “Dövlət rüsumu haqqında” Azərbaycan Respublikasının Qanununda nəzərdə tutulan qaydada və miqdarda dövlət rüsumu ödəməklə dövlət rüsumunun ödənilməsinə dair sənədi ərizəyə əlavə etməlidirlər. Dövlət rüsumu soyadın, adın və ata adının dəyişdirilməsinin qeydə alınmasının Azərbaycan Respublikasında və ya Azərbaycan Respublikasının xarici ölkələrdəki diplomatik nümayəndəliklərində aparıldığı hallarda 20 ABŞ dolları, qeydiyyat şöbələrində aparıldığı hallarda isə 15 manat təşkil edir”.

 

Müsahibimizin sözlərinə görə, qeydiyyat şöbəsi və ya konsulluq idarəsi əldə olunan sənədlərə əsasən ərizənin məzmununu və yoxlamanın nəticələrini nəzərə alır:

 

“15 gün müddətində ərizə verən şəxsin soyadının, adının, ata adının dəyişdirilməsinin mümkünlüyünü əks etdirən rəy tərtib edir. Adın, ata adının və soyadın dəyişdirilməsi mümkün hesab edilmədikdə, qeydiyyat şöbəsi və ya konsulluq idarəsi bundan imtina edilməsi barədə qərar çıxarır, 5 iş günü müddətində bu barədə ərizə verən şəxsə məlumat verir və qeydiyyat şöbəsinə və ya konsulluq idarəsinə gəldiyi gün həmin qərarın bir nüsxəsini təqdim etdiyi sənədlərlə birlikdə ona qaytarır.
Ad, ata adı, soyad dəyişdirildiyi halda qeydiyyat şöbəsi və ya konsulluq idarəsi 3 iş günü müddətində bu barədə ərizə verən şəxsə məlumat verir və o, qeydiyyat şöbəsinə və ya konsulluq idarəsinə gəldiyi gün adın, ata adının, soyadın dəyişdirilməsini qeydə alır və müvafiq şəhadətnamə verir”.

 

Nərmin Həşimova