“Onlar yalnız fiziki deyil, emosional çətinliklər də yaşayırlar”

Bölmə: Sosial › ,
Tarix: 21:38 03.04.2025

Hər bir qadının həyatında önəmli anlardan biri onun ana olmasıdır. Ana olmaq həm psixoloji, həm fiziki olaraq qadının rastlaşacağı ən çətin və məsuliyyətli anlardan biridir. Çünki,bədəndə istər-istəməz hormonal dəyişikliklər gedir.

 

Mövzu ilə bağlı ginekoloq Nigar xanım “informator az”a açıqlamasında bildirib ki, qadın bəzi hallarda riskli hamiləlik keçirə bilir. Bunun sonunda isə istər təbii, istər keysəriyyə yolu ilə övladlarını dünyaya gətirirlər:

 

“Hər iki halda qadın fiziki olaraq əziyyət çəkir və sonrasında isə artıq həm öz sağlamlığını bərpa etməklə yanaşı, doğulan körpəsinin qayğısına qalmaq həm onu qidalandırmaq, onun yeni dünyaya gəlişini, adaptasiya prosesini həyata keçirmək kimi çox böyük məsuliyyətli bir yola başlayır. Tibbdə də el arasında da deyildiyi kimi zahılıq dövrü vardır ki, qadının həyatında sağlamlığı üçün çox önəm daşıyan bir zamandır və bu 42 günü təşkil edir. Erkən zahılıq dövrü ilk 2 sutkanı təşkil edir ki, bu sutkada qadınlar qanaxma, uşağlığın yığılması kimi problemlərlə üzləşirlər. Ginekoloq və mamaların nəzarəti altında olurlar. Sonrakı zahılıq dövründə isə daim nəzarət və diqqətdə olmalıdırlar. Uşaqlığın yığılması qadınlarda daimi qarınaltı və bel nahiyələrində ağrılar büruzə verir. Həmçinin doğuşun 3-cü sutkasında ana südü gəlir və südün get-gedə artışı, həm uşağın az qidalanması anada süd vəzisi iltihabı kimi problemə gətirib çıxarda bilir. Ginekoloq və mamanın məsləhəti ilə xanım bu perioduda düzgün idarə etməlidir. Az qidalanan körpəsinə də artıq südü sağıb onu xaric etməlidir. Temperatur və şişkinlik kimi problemlə rastlaşmasın. Hava şəraitinə də nəzarət edilməlidir. Əməliyyat keçiribsə bundan sonra yoluxma ehtimalı minimuma düşsün. Biz bütün hamilələrə və zahılara maksimum sağlam qidalanma önəriləri veririk. Zahılıqda bu çox önəmlidir. Buna görə də ana öz övladına süd verir və südün keyfiyyətli yaxud da bol olması ananın qidalanmasından çox asılıdır. Təbii ev xörəkləri, sulu xörəklər, maye qəbulu məsləhət görürük, çünki xanım maye itirir, südün də keyfiyyətli olması üçün vitaminlərdən istifadə etməlidir. Marketlərdə olan hazır qidalardan istifadə etməməlidir. Ana doğuşdan sonra pozulmuş yuxu rejimi olur. Hamilələrə adətən səhər yuxu gəlir gecə isə əksinə, yuxu pozulur. Zahılıq dövründə də yenə körpəsinə nəzarət etdiyi üçün yenə də yuxu pozğunluğu meydana gəlir. Uşağı periodik qidalandırmaq lazımdır. Ana körpəni belə qidalandırmaqla yuxu rejimini düzəltmiş olar”.

Ətirə İbayeva