Zehnin gizli oyunları-Özümüzdən gizləndiyimiz anlar

Bölmə: Sosial › ,
Tarix: 22:03 03.04.2025

Bəzən düşüncələrimiz və hisslərimiz bizdən gizlənir, elə bil ki, zehnimiz öz içində bir oyun oynayır. Qəribə duyğular, ani qorxular və izah edə bilmədiyimiz reaksiyalar – bütün bunlar şüuraltımızın bizə ötürdüyü mesajlar ola bilər. Ancaq biz bu gizli siqnalları görməyə və anlamağa çalışmasaq, onlar bizi idarə edən görünməz qüvvələrə çevrilə bilər.

 

Psixoloq Aynur İsmayılova “İnformator.az”a açıqlamasında bildirib ki, insanların diqqətinin yüksək olması şüurun aktivliyini artırır:

 

“Şüur nə qədər aktivdirsə, insan öz hərəkətlərini bir o qədər yaxşı idarə edə bilir. Görsəl diqqət yüksəkdirsə, insan duyğularını və düşüncələrini daha yaxşı tənzimləyir. Amma diqqətimiz zəifdirsə, sosial mühitdən uzaq qalırıqsa, dostlarımız azdırsa, bu, şüuraltının təsirini gücləndirir. Bu zaman yuxularımızda gördüklərimiz və ağlımıza gələn fikirlər bizə mənfi təsir göstərə bilər. Nəticədə həyatda özümüzü idarə etməyi çətinləşdiririk. Məsələn, səbəbsiz yerə aqressivləşə və bunun fərqində olmadan kiməsə ziyan verə bilərik. Zehnimizin gizlətməyə çalışdığı duyğuları üzə çıxarmaq üçün sosial çevrəmizi genişləndirməliyik. Sosial aktivliyimizi artırmalı, daha çox mütaliə etməli və insanlarla sıx ünsiyyətdə olmalıyıq ki, duyğularımızı və düşüncələrimizi daha yaxşı idarə edə bilək".

 

Nigar Həsənzadə