“Blok imtahanı hər zaman buraxılış imtahanına nisbətdə çətin, düşündürücü və yaradıcı olur”

Bölmə: Sosial › ,
Tarix: 23:40 03.04.2025

Təhsil gündəmimizin ən önəmli mövzularından biri də bu il keçiriləcək blok imtahanlarının səviyyəsi və hansısa dəyişikliyin olamasıdır.

 

Bu barədə təhsil eksperti Rizvan Fikrətoğlu "İnformator.az"a açıqlama verib:
 

"Artıq cari ilin məzunlarının buraxılış imtahanı mərhələsi başa çatıb və bunun cavablarını şagirdlər, valideynlər və müəllimlər səbirsizliklə gözləyirlər. Cavablar imtahandan sonrakı 6 həftə ərzində açıqlanacaq. Əvvəlki illərin məzunlarının buraxılış imtahanı isə aprelin 6-sı keçiriləcək.

Buraxılış imtahanı ötən ilə nisbətən asan sualları ilə diqqət çəkdi. Bu, normaldır. Çünki şagirdin attestatına 3 fənnin nəticəsi buraxılış imtahanının nəticəsi təsir edir. Həmçinin kollec və yüksək texniki peşə məktəbinə qəbul prosesi buraxılış imtahanında toplanılan bal əsasında həyata keçirilir. Əgər ali məktəbə qəbuldan danışırıqsa, artıq meyarlar çətinliyə doğru dəyişir".

O qeyd edib ki, blok imtahanı hər zaman buraxılış imtahanına nisbətdə çətin, düşündürücü və yaradıcı olur:

 

"Blok imtahanının 1-ci cəhd qeydiyyatı aprelin 17-dən, mayın 1-nə qədər davam edəcək. İmtahanın 1-ci cəhdinin keçirilməsi təxminən may-iyun aylarında həyata keçiriləcək. İmtahan gedişatında dəyişiklik gözlənilmir. Ötən illərdə keçirilən qaydada baş tutacaq".

 

Müsahibimizin sözlərinə görə, imtahan olmadan onun çətinlik səviyyəsi haqqında tam danışa bilmərik:

 

"Abituriyentləri hansı fəndə çətinliklə rastlaşacağı məsələsinə gəldikdə isə bunu deyə bilərəm ki, şagird hansı fəndə zəifdirsə, elə orada da çətin olduğunu düşünəcək. Son olaraq məsləhətim isə imtahana qədər qalan müddəti düzgün dəyərləndirsinlər, səmərəli istifadə edərək mövzulara diqqət yetirsinlər, imtahana ən çox salınan mövzuları daha çox nəzərdən keçirsinlər".

 

Zəhra Möhübbətova