Dariya xəstəliyi-Dermatoveneroloq AÇIQLAYIR

Bölmə: Sosial › ,
Tarix: 21:53 04.04.2025

“Dariya xəstəliyi nadir görülən, genetik dəri xəstəliyidir və autosom-dominant şəkildə irsən ötürülür. Bu xəstəlik genlərdə mutasiya nəticəsində baş verir və bu genlər hüceyrədaxili kalsium balansını tənzimləyən zülalın sintezində iştirak edən genlərdir”.

 

Bu sözləri dermatoveneroloq Tünzalə Əzizli "İnformator.az"a açıqlamasında deyib.

Dermatoveneroloq qeyd edib ki, bu, zülalda problem yarananda dəri hüceyrələrinin bir-birinə birləşməsi düzgün getmir, nəticədə dəridə tipik lezyonlar əmələ gəlir:

 

“Yağlı, qəhvəyi rəngdə, pis qoxulu, qaşıntılı və qabıqlı səpkilərlə müşahidə olunur. Sinə, kürək, alın, bəzən isə saçlı dəri və qasıq nahiyələrində rast gəlinə bilər. Dırnaq dəyişiklikləri müşahidə olunur, xüsusən keratinizasiya ilə bağlı düzgün bölünmə getmədikdə dırnaqlarda çıxıntılar, uzununa zolaqlar, dırnaq yatağında dəyişikliklər müşahidə olunur. Eyni zamanda ağız boşluğu və digər selikli qişalarda da lezyonlar görülə bilir, bəzən prosesə qaşınma və ikincili infeksiyaların qoşulması mümkündür”.

 

Dermatoveneroloqun sözlərinə görə, bu xəstəlik yeniyetməlik dönəmində başlayır və xəstəliyi provokasiya edən amillərə stress, istilik, həddindən artıq tərləmə, günəş şüaları da bu amillərə aiddir:

 

“Diaqnoz adətən klinik görünüşə və irsi məlumatlara əsasən qoyulur, təbii ki, burada dəri biopsi önəmli rol oynayır, lazım gələrsə, digər genetik testlər də aparılır. Xəstəliyin tam olaraq müalicəsi yoxdur, simptomları nisbətən azaltmaq olar, qabıqlanma və sərtləşməni azaltmaq üçün topikal retinol və keratolitik kremlər istifadə etmək olar. Əgər ikincili infeksiyalar varsa, antibiotiklər və düzgün qaydada günəşdən qorunma vasitələri istifadə etmək olar”.

 

Nərmin Həşimova