Xaricdə təhsil-Gənclər üçün fürsət, yoxsa diplomun tanınmaması riski?

Bölmə: Sosial › ,
Tarix: 22:09 04.04.2025

Xaricdə təhsil almaq gənclərə çoxsaylı imkanlar təqdim edir. Həm akademik, həm də şəxsi inkişaf baxımından bu təcrübə həyatın dönüş nöqtələrindən biri ola bilər.

 

Bu fikirləri “İnformator.az”a açıqlamasında təhsil üzrə ekspert Kamran Əsədov bildirib. Onun sözlərinə görə, xaricdə təhsil alan tələbələr yalnız yeni biliklər öyrənməklə kifayətlənmirlər, eyni zamanda fərqli həyat tərzlərinə uyğunlaşmağı öyrənirlər:

“Bundan əlavə, müxtəlif ölkələrdə təhsil alan gənclər bir çox fərqli mədəniyyətlərlə tanış olur, yeni dostluqlar qurur və gələcək karyeraları üçün beynəlxalq əlaqələr yaradırlar”.

 

K.Əsədov xaricdə təhsilin mənfi tərəflərindən də söz açıb:

“Lakin xaricdə təhsil almağın mənfi tərəfləri də olur. Bunlardan biri də diplomun tanınmamasıdır. TKTA-nın təqdim etdiyi məlumatlara əsasən 2023-cü ildə nostrifikasiya üçün təqdim olunan xarici diplomlardan təxminən 22 faizi tanınmayıb. Səbəblər arasında distant təhsilin olması, tədris müddətinin normadan az olması,universitetin akkreditasiyasının olmaması və təhsil proqramlarının keyfiyyətsizliyi durur”.

 

Ekspert diplomu tanınmayan universitetlərin böyük bir hissənin Ukrayna, Rusiya, Gürcüstan və Qazaxıstan kimi postsovet ölkələrinə aid olduğunu vurğulayıb:

“Diplomu tanınmayan məzunların üzləşdiyi problemlər təkcə iş tapmaqla məhdudlaşmır, onlar dövlət qurumlarında çalışa bilmədikləri kimi digər dövlət səviyyəli (MİQ, magistratura, doktorantura və s.) müsabiqə iştirakından məhrum olurlar”.

 

Ekspert sonda əlavə edir ki;

“Diplom tanınması məsələsi yalnız texniki və hüquqi prosedur kimi deyil insan resursları strategiyasının bir hissəsi kimi nəzərdən keçirilməlidir. Bu cür halların azalması üçün də sərt yox, əsaslandırılmış və çevik idarəetmə mexanizmi tətbiq edilməlidir”, - deyə o, yekunlaşdırıb.

 

Aytac Bakıxanova