Müəllimə xəsarət yetirilməsi cinayət məsuliyyəti yaradır-Hüquqşünasdan Goranboy insidenti ilə bağlı açıqlama

Bölmə: Sosial › ,
Tarix: 22:27 04.04.2025

Goranboy rayonu Hazırəhmədli kənd tam orta məktəbdə insident baş verib. Belə ki, 2-ci sinifdə təhsil alan şagirdlərdən birinin valideyni məktəbə daxil olaraq övladını döyməyə cəhd edib. Sinif rəhbəri şagirdi qorumaq istəyən zaman valideyn müəllimə xəsarət yetirib. Dərhal məktəb rəhbərliyi tərəfindən təcili tibbi yardım xidmətinə və hüquq-mühafizə orqanlarına məlumat verilib. Valideynin uyğunsuz davranışı ilə bağlı hazırda hüquq-mühafizə orqanları tərəfindən araşdırma aparılır. Əldə edilən məlumata əsasən, şagirdin psixoloji durumu məktəb rəhbərliyi və idarə tərəfindən izlənilməkdədir.

 

Mövzu ilə bağlı hüquqşünas Rafiq Novruzov “İnformator.az”a açıqlama verib:

“Goranboy rayonu Hazırəhmədli kənd tam orta məktəbində baş verən insident təhsil sistemində ciddi narahatlıq doğurur. Sözügedən hadisə hüquqi cəhətdən bir neçə istiqamətdə qiymətləndirilə bilər. Valideynin məktəbə daxil olaraq övladını döyməyə cəhd etməsi və müəllimə fiziki xəsarət yetirməsi, Azərbaycan Respublikası Cinayət Məcəlləsinin 127-ci (qəsdən sağlamlığa az ağır zərər vurma) və 128-ci (qəsdən sağlamlığa yüngül zərər vurma) maddələri əsasında cinayət məsuliyyəti yarada bilər”.

 

Hüquqşünasın sözlərinə görə, xəsarətin dərəcəsi daha ağırdırsa, bu halda 126-cı maddə (qəsdən sağlamlığa ağır zərər vurma) da tətbiq edilə bilər:

“Bu, artıq ciddi cinayət sayılır və məhkəmənin qərarından asılı olaraq azadlıqdan məhrumetmə cəzası nəzərdə tutula bilər. Müəllim təhsil müəssisəsində vəzifə borcunu yerinə yetirərkən şagirdi qorumağa çalışıb və bu zaman fiziki hücuma məruz qalıb”.

 

R.Novruzov bildirir ki, əgər valideyn müəllimə bilərəkdən və məqsədli şəkildə xəsarət yetiribsə, bu zaman Cinayət Məcəlləsinin 315-ci maddəsi (hakimiyyət nümayəndəsinə və ya ictimai vəzifəli şəxsə müqavimət göstərmə və ya zor tətbiq etmə) ilə qiymətləndirilə bilər:

“Valideynin öz övladını məktəbə gələrək döyməyə cəhd etməsi uşağın fiziki və psixoloji sağlamlığına təhdiddir”.

 

Hüquqşünas sonda əlavə edir ki, bu hal həmçinin, Uşaq Hüquqları haqqında Konvensiyanın, Azərbaycan Respublikasının Ailə Məcəlləsinin və “Uşaq Hüquqları haqqında” qanunun da pozulmasıdır:

“Bu səbəbdən valideynə qarşı həm cinayət, həm də inzibati tədbirlər görülə bilər”, - deyə o, yekunlaşdırıb.

 

Nərmin Hüseynli