İsveç nəşri Azərbaycandakı mina təhlükəsi barədə məlumat yayıb

Bölmə: Maraqlı › ,
Tarix: 21:32 04.04.2025

Bakı, 4 aprel 2025 – İsveçin Diplomatic World Sweden veb saytı Beynəlxalq Mina Maarifləndirmə və Mina Fəaliyyətinə Yardım Günü münasibətilə Azərbaycandakı mina təhlükəsi barədə məqalə dərc edib.

 

AZƏRTAC-ın məlumatına görə, məqalədə vurğulanır ki, 4 aprel Azərbaycan üçün sadəcə bir tarix deyil, həm də insan həyatını təhlükəyə atan və ölkənin bərpa prosesini ləngidən bir təhdidin gündəlik xatırladılmasıdır. Məqalədə bildirilir ki, Ermənistanın 30 ilə yaxın davam edən işğalı dövründə Azərbaycan ərazisinin 13 faizindən çoxu piyada əleyhinə minalar və partlamamış sursatlarla çirkləndirilib. 2020-ci ildə müharibə başa çatdıqdan sonra 387-dən çox mülki şəxs həlak olub və ya ağır yaralanıb. Ümumilikdə, münaqişənin başlanmasından bu günə qədər 3,400-dən çox insan, o cümlədən yüzlərlə qadın və uşaq mina partlayışlarının qurbanı olub. Nəşr qeyd edir ki, minalar təkcə hərbi təhlükə yaratmır, eyni zamanda məcburi köçkünlərin geri qayıtmasına, infrastrukturun bərpasına və ətraf mühitin qorunmasına ciddi maneə törədir. Ekspertlərə görə, Azərbaycan dünyanın ən çox minalanmış ölkələrindən biridir və hazırda ölkə ərazisində təxminən 1.5 milyon mina mövcuddur. Bundan əlavə, məqalədə vurğulanır ki, Azərbaycan genişmiqyaslı minatəmizləmə işləri aparsa da, beynəlxalq dəstək olduqca məhduddur və bu dəstək ümumi resursların cəmi 5 faizini təşkil edir. Beynəlxalq ictimaiyyətə çağırış edilən məqalədə Ermənistanın hələ də mina sahələrinin tam və dəqiq xəritələrini təqdim etməkdən imtina etməsi səbəbindən humanitar əməliyyatların və 800,000-dən çox məcburi köçkünün geri qayıdışının çətinləşdiyi vurğulanır. Bununla yanaşı, məqalədə Azərbaycanın beynəlxalq təşəbbüslərdə aktiv iştirak etdiyi və humanitar minatəmizləmənin BMT-nin Dayanıqlı İnkişaf Məqsədləri siyahısına 18-ci məqsəd kimi daxil edilməsini təklif etdiyi qeyd olunur. Məqalənin müəllifi beynəlxalq ictimaiyyəti moral dəstəkdən əlavə, Azərbaycana maliyyə, texniki və humanitar yardım göstərməyə çağırır ki, mina sahələri təmizlənib insanlar dinc həyata qayıda bilsinlər. Xatırladaq ki, Diplomatic World Sweden portalının əsas auditoriyasını İsveçdə akkreditə olunmuş diplomatlar, siyasətçilər və diplomatik korpus əməkdaşları təşkil edir.

 

Caliber
Billurə Quliyeva