Yuxu – Sağlam həyatın təməli, yoxsa laqeyd münasibətin nəticəsi?-AÇIQLAMA

Bölmə: Sosial › ,
Tarix: 15:49 05.04.2025

"Düzgün yuxu rejimi insan orqanizmi üçün ən vacib şərtlərdən biridir. Bu, təkcə istirahət vasitəsi deyil, eyni zamanda bir çox həyati vacib funksiyaların bərpasını təmin edən prosesdir. Gecə saatlarında orqanizmdə sintez olunan hormonlar, xüsusilə melatonin və onun təsiri ilə yaranan serotonin, insanın həm psixoloji, həm də fiziki sağlamlığında mühüm rol oynayır".

Bu fikirləri “informator.az”a açıqlamasında həkim-terapevt Gülmalıyeva Aybəniz bildirib.

Onun sözlərinə görə, düzgün yuxu rejiminə əməl olunmadıqda təkcə əhval-ruhiyyədə deyil, həm də bütün orqan və sistemlərin fəaliyyətində pozğunluqlar baş verə bilər:

”Yuxusuzluq təkcə yorğunluq deyil.Uzunmüddətli yuxu pozuntuları sinir sistemində gərginlik, bağırsaq və ürək fəaliyyətində nizamsızlıq, beyin qan dövranında zəifləmə, ümumi hormon balansında pozğunluq kimi nəticələrə səbəb olur. İnsan bədəni müəyyən saatlarda, xüsusilə saat 23:00-dan 01:00-a qədər bioloji saatla idarə olunan hormonları sintez edir. Bu hormonlar arasında ən önəmlisi melatonindir ki, bu da sakitləşdirici, bərpaedici təsirə malikdir. Bu müddətdə yatmayan insanlarda hormon sintezi pozulur və nəticədə serotonin çatışmazlığı yaranır. Bu da əhval-ruhiyyənin pisləşməsinə və xroniki gərginliyə səbəb olur".

Həkim yuxu problemi yaşayanlara tövsiyələr verib:

"Əgər yuxu rejiminiz pozulubsa, özbaşına dərman qəbulu çox təhlükəlidir. Bu zaman mütləq mütəxəssisə müraciət olunmalıdır. Dərman müalicəsi ilə yanaşı, gündəlik qrafikə uyğun yuxu rejimi, təmiz havada yürüyüşlər, düzgün qidalanma da çox önəmlidir.
Yuxu məsələsinə yalnız istirahət kimi deyil, sağlam həyatın ayrılmaz hissəsi kimi baxılmalıdır. Hər bir fərd yuxu rejiminə qarşı daha məsuliyyətli yanaşmalı və sağlam həyat tərzini prioritet seçməlidir".

 

Maya Bayramova