Qanunla övladlığa götürmə: Kimlər uşaq sahibi ola bilməz?-AÇIQLAMA

Bölmə: Sosial › ,
Tarix: 15:58 05.04.2025

Övladlığa uşaq götürmək, cəmiyyətin sosial və hüquqi strukturlarında mühüm yer tutan mövzulardan biridir. Hər il dünyada minlərlə ailə övladlığa uşaq götürərək, uşaqlara sevgi, qayğı və təhsil verirlər. Bu prosesin həm hüquqi, həm də emosional tərəfləri mövcuddur. Vətəndaşların bu məsələdə böyük məsuliyyət daşıyırlar.  Bəs qanuna görə övladlığa uşaq götürmək üçün hansı nüanslar vacibdir?

Bu barədə Vəkillər Kollegiyasının üzvü vəkil Hikmət Əliyev "İnformator.az"a açıqlama verib. Vəkil qeyd edib ki, Ailə məcəlləsində övladlığa uşaq götürən şəxsin ən az 25 yaşı olmalıdır:

"Lakin nikahda olmayan şəxslər üçün isə, bu minimum 30 yaşdır. Burada uşaqların marağı ilk sıradadır. Bu proses xoşbəxtliklə yanaşı, bir sıra problemləri özündə əks etdirir. Həmçinin, övlad sahiblənmək istəyən vətəndaşlar bilməlidir ki, bu iş uzun çəkən prosesdir. Qanunvericiliyin bu mövzu ilə bağlı sıx qaydaları var. Edilən müraciətlərdə uşaqların maraqlarının qorunması əsas şərtdir. İnsanlar özləri də ailə vəziyyətlərini, maddi gəlirlərini, sağlamlıq potensialını, hansısa cinayət əməlində adının hallanıb-hallanmadığını fakt kimi dövlətə təqdim etməlidir. Ailə məcəlləsinin 120-ci maddəsində uşağı övladlığa götürmək hüququ olmayan şəxslərin dairəsi dəqiq göstərilib. Qanun həmin göstərişlərə cavab verməyən şəxslərə övlad vermir. Göstərişlər sırasında, məhkəmə tərəfindən fəaliyyət qabilliyəti olmayan, valideynlik hüququndan məhrum edilən vətəndaşlara aid edilir".

Zaur Abdullayev