“Şəxsi informasiyaların paylaşılması ciddi təhlükələrə yol aça bilər” -ŞƏRH

Bölmə: Sosial › ,
Tarix: 17:21 05.04.2025

 

Son illərdə sosial şəbəkələrin həyatımıza daxil olması ilə yanaşı, şəxsi məlumatların təhlükəsizliyi məsələsi də ciddi narahatlığa səbəb olub. "Facebook" , "Instagram", "Twitter"və digər platformalarda istifadəçilər şəxsi məlumatlarını, şəkillərini və hətta yerlərini paylaşmaqda heç bir çətinlik çəkmirlər. Lakin bu məlumatların yanlış əllərə keçməsi və ya kiberhücumlar nəticəsində zərər görməsi riski böyükdür. İnternetin təhlükəsizliyi ilə bağlı mütəxəssislər xəbərdarlıq edir ki, sosial şəbəkələrdə şəxsi məlumatların qorunması üçün ciddi tədbirlər görülməlidir.

 

Bu barədə ekspert Kənan Novruzov “informator.az”a açıqlamasında bildirib ki, insanlar sosial şəbəkələrdə öz şəxsi həyatlarını ictimailəşdirməkdən çəkinmirlər:

 

“Sosial şəbəkələr meydana gələndən bəri cəmiyyətin həyatında ciddi dəyişikliklər müşahidə olunmağa başladı. Bu dəyişikliklərdən biri də şəxsi həyata müdaxilə ilə bağlıdır. Şəxsi həyata müdaxilə elementləri güclənib. Eyni zamanda , insanlar sosial şəbəkənin təsiri ilə artıq öz şəxsi həyatlarını ictimailəşdirirlər.
Bu da bir sıra hallarda insanın özünə qarşı istifadə olunmasına, şəxsi informasiyalarının ələ keçirilməsinə yol açıb. Bu məsələ həm sosioloji, psixoloji, həm də hüquqi, informasiya texnologiyalarının qiymətləndirlməsi olan məsələdir”.

 

Ekspert insanlar niyə sosial şəbəkələrdə öz şəxsi həyatlarını bölüşüdüyünü də açıqlayıb:

 

“İnsanlar buna ehtiyac duyurlar. Öz hislərini, emosiyalarını bölüşmək istəyirlər. Bu psixoloji tərəfidir. Sosioloji tərəfi odur ki, əvvəllər belə imkanlar yox idi. Birdən-birə belə bir təlabat yarandı. “Xalçaya bürün,el ilə sürün” ifadəsi özünü burada da göstərir. İnsanlar bir birindən geri qalmaq istəmir. Biri gedib bahalı restoranda foto çəkib paylaşırsa digəri də bunu etmək istəyir. Kimdəsə ağır itki baş verəndə , bunu da paylaşırlar. Sanki öz dərdlərini bölməyə can atırlar”.

 

Müsahibin sözlərinə görə, şəxsi informasiyaların paylaşılması ciddi təhlükələrə yol aça bilər:

 

“Başqa bir tərəfdən müxtəlif, oyunlar, proqramlar var ki, insanlardan şəxsi informasiyalarını - email, nömrə, hətta şəxsi kart nömrələrini istəyə bilir. Bunları ələ keçirdikdən sonra müxtəlif hacker hücumları, təhdidlər meydana çıxır. Bunların hər biri şəxsi həyata müdaxilə ilə nəticələnir.
Ən qəribəsi odur ki, insanlar öz şəxsi informasiyalarını istəyərək bölüşürlər. Bu da xoş tendensiya deyil".

 

 

Maya Bayramova