“Kitabların baha olması normaldır”

Bölmə: Sosial › ,
Tarix: 19:22 05.04.2025

 

Ölkədə abituriyent hazırlığı geniş yayılıb. Dərs vəsaitləri ilə yanaşı, hazırlıq zamanı istifadə edilən əlavə vəsaitlər isə olduqca bahadır. Hətta hər il eyni tərkibdə olan test məhsullarının qiyməti qalxır. Bu da valideynlər arasında ciddi narazılığa səbəb olur. Hər fənndən ən azı 2-3 vəsait tələb olunursa, bu həm şagirdlər, həm də valideynlər üçün problem yaradır.

 

Təhsil məsələləri üzrə ekspert Elşən Qafarov “informator.az”a açıqlamasında bildirib ki, şagirdlər üçün Dövlət İmtahan Mərkəzi (DİM), Elm və Təhsil Nazirliyi vəsaitlər çap edir:

 

“Həmçinin ayrı-ayrı kursların və müəllimlərin də öz kitabları var. Kitabların baha olması isə, normaldır. Çünki ölkə ərazisində yeni çap olunan bütün kitablar bahadır. Kitab bazarında monipoliya mövcuddur. Hətta bazar 15-16 nəfərin əlində cəmləşdiyi üçün ümumi gəlirin 40%-i bazarın payına düşür.

 

Bəzi kitablar Əqli Mülkiyyət Agentliyindən qeydiyyatdan keçmir. Nəticədə müəlliflik hüququ qorunmur. Bu məsələlərin həlli istiqamətində planlar hazırlanmalıdır. Elektron vəsaitlərə üstünlük verilməli və cəmiyyət buna öyrəşməlidir. Bu gün kitab bazarında ən çox satılanlar da abituriyent hazırlığı kitablarıdır. Onlar da davamlı olaraq, son prinsiplər üzərində qurulmalıdır”.

 

Zaur Abdullayev