Tarixi abidələrin orijinallığını azaldan reklam lövhələri

Bölmə: Sosial › ,
Tarix: 20:08 05.04.2025

 

Son illər şəhərimizin tarixi binalarının fasadlarında, dam örtüklərində, hətta zədələnmiş divarlarında müasir reklam lövhələri yerləşdirilir. Bu da abidələrin görkəmini pozur, orijinallığını azaldır.  

 

Sözügedən məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli "İnformator.az"a açıqlamasında bildirib ki, tarixi abidələrin bədii-estetik görkəmini pozan hər hansı müdaxilənin edilməsi yolverilməzdir:

 

"Qanunsuz müdaxilə faktları ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən aparılan monitorinqlərin nəticələri göstərir ki, tarix-memarlıq abidələrinin bədii-estetik görkəminə xələl gətirən müdaxilələrin əsas hissəsini abidələrin fasadlarına müxtəlif məişət qurğularının vurulması, kommunikasiya xətlərinin çəkilməsi, o cümlədən reklam lövhələrinin yerləşdirilməsi kimi hallar təşkil edir”.

 

Ekspert qeyd edib ki, tarixi abidələrin bədii-estetik görkəminin dəyişdirilməsi, onlar üçün təhlükə yarada biləcək təmir, inşaat, təsərrüfat və digər işlərin aparılması qadağandır:

 

“Abidələrin üzərində bərpa, konservasiya, təmir və digər işlər onların layihələri Dövlət Xidməti tərəfindən təsdiq edildikdən sonra aparılmalıdır. Eyni zamanda reklam qurğuları tarix və mədəniyyət abidələrinin ərazilərində, memarlıq abidələrinin (binalarının) fasad hissəsində və dam örtüklərində quraşdırılması Dövlət Xidmətinin razılığı ilə həyata keçirilməlidir. Tarixi abidələrin üzərinə onların bədii-estetik görkəmini pozan, dayanıqlığına xələl gətirən hər hansı müdaxilənin edilməsi yolverilməzdir. Bura reklam lövhələri də daxildir.

Ötən il abidə-binalarda fəaliyyət göstərən obyektlərdə qanunsuz yerləşdirilən, abidələrin xarici görkəmini pozan 160-dan artıq reklam lövhəsi müəyyən olunub və həmin lövhələr sökülüb. Eyni zamanda, tarixi abidələrə 117 digər müdaxilə faktı aşkar edilib və qanunamüvafiq tədbirlər görülüb”.

 

 

İlahə Həsənova