SELİN FƏSADLARI

Bölmə: Hadisə › ,
Tarix: 17:38 30.08.2023

   Güclü yağışlar nəticəsində bir sıra əraziləri sel basıb. Seldən ziyan görən rayonlardan biri də Şəkidir. Sel Şəkinin Aydınbular, Fazıl, Cəfərabad kəndlərinə daha çox ziyan vurub.

   Şəkinin Cunud kəndi ərazisindən axan Qara çaya sel gəlməsi nəticəsində kəndlə Şəki şəhərinin əlaqəsi kəsilib. Dağlardan gələn sel suları Cunud kənd sakini Röyal Nadirova məxsus "VAZ-2106" markalı avtomobili də aparıb. Nəticədə avtomobil yararsız vəziyyətə düşüb.

   Şəki sakini Rəhim Sabirlinin sözlərinə görə, hündürlüyü 20-40 sm olan sel fərdi yaşayış evlərinə də ziyan vurub. "Şiddətli sel əkin sahələrini yararsız hala gətirib, kənd sakinlərinin təsərrüfatına xeyli ziyan dəyib, yollar sıradan çıxıb. Bu da avtomobilləri hərəkətsiz vəziyyətə gətirib".

   Şəki ilə yanaşı Masallı, Xaçmaza da yağan güclü yağışlar fəsadlar törədib. Həmçinin, Naxçıvana, Goranboya, Göygölə də yağış nəticəsində sel gəlib. Həmin ərazilərdə də sel kənd əhalisi üçün ziyanverici fəsadlar törədib.

ÇİNARƏ MURADOVA