20 Yanvar – Xalqın qürur və qəhrəmanlıq salnaməsi

1990-cı il yanvarın 19-dan 20-nə keçən gecə Azərbaycan xalqının tarixində ən faciəli, eyni zamanda ən şərəfli səhifələrdən biri yazıldı. Həmin gecə sovet imperiyasının hərbi birləşmələri Bakıya və respublikanın bir sıra bölgələrinə yeridilərək dinc əhaliyə qarşı misli görünməmiş qəddarlıq nümayiş etdirdi. Silahsız insanlar – qadınlar, uşaqlar, qocalar amansızcasına qətlə yetirildi, yüzlərlə insan yaralandı, minlərlə ailənin ocağına ağır matəm çökmüş oldu.

20 Yanvar faciəsi yalnız qanlı bir hadisə deyil, həm də Azərbaycan xalqının azadlıq iradəsinin, milli ləyaqətinin və mübarizə əzminin parlaq təcəssümüdür. Həmin gecə tökülən şəhid qanı ilə Azərbaycanın yeni tarixi yazıldı. Xalq qorxuya yox, mübarizəyə üstünlük verdi və öz taleyinin sahibinin özü olduğunu bütün dünyaya bəyan etdi.

Faciənin əsas məqsədi milli azadlıq hərəkatını boğmaq, xalqın iradəsini sındırmaq idi. Lakin nəticə tam əksinə oldu. 20 Yanvar hadisələri Azərbaycan cəmiyyətində milli birliyi daha da möhkəmləndirdi, müstəqillik ideyasını dönməz etdi. Şəhidlərin dəfni zamanı yüz minlərlə insanın küçələrə çıxaraq həmrəylik nümayiş etdirməsi xalqın sarsılmaz ruhunu açıq şəkildə göstərdi.

Ulu Öndər Heydər Əliyevin 20 Yanvar faciəsinə verdiyi siyasi-hüquqi qiymət bu hadisənin mahiyyətinin dünyaya çatdırılmasında mühüm rol oynadı. Onun qətiyyətli mövqeyi nəticəsində 20 Yanvar hadisələri Azərbaycan xalqına qarşı törədilmiş hərbi-siyasi cinayət kimi tanındı. Sonrakı illərdə şəhidlərin xatirəsinin əbədiləşdirilməsi, onların ailələrinə dövlət qayğısının göstərilməsi dövlət siyasətinin əsas istiqamətlərindən birinə çevrildi.

Bu gün, faciədən 36 il keçməsinə baxmayaraq, 20 Yanvar Azərbaycan xalqının yaddaşında hüzn və kədər günü olmaqla yanaşı, qürur və qəhrəmanlıq rəmzi kimi yaşayır. Şəhidlər Xiyabanı təkcə matəm məkanı deyil, həm də azadlıq, istiqlal və milli ləyaqət məktəbidir. Hər il minlərlə insanın buraya axışması xalqın öz şəhidlərinə olan sonsuz ehtiramının göstəricisidir.

20 Yanvar şəhidləri müstəqil Azərbaycan dövlətinin təməl daşlarını canları bahasına ucaldan qəhrəmanlardır. Bu gün suveren, azad və güclü Azərbaycan varsa, bunun bünövrəsində 20 Yanvar şəhidlərinin müqəddəs qanı dayanır. Dövlət müstəqilliyimizin bərpası, azadlığımız və bu gün əldə etdiyimiz nailiyyətlər üçün ilk növbədə onlara borcluyuq.

20 Yanvar faciəsi bizə azadlığın qiymətini, Vətənə sədaqətin nə demək olduğunu xatırladır. Bu tarix nəsildən-nəslə ötürülməli, gənc nəslin vətənpərvərlik ruhunda tərbiyəsində mühüm rol oynamalıdır. Azərbaycan xalqı 20 Yanvar şəhidlərini heç zaman unutmayacaq, onların xatirəsi daim uca tutulacaqdır.

"Ahıllara və Tənhalara" Dəstək ictimai birliyinin sədri Ruhiyyə Məmmədova