Aİ Macarıstandan Rusiya ilə bağlı iddiaları izah etməyi istəyib

Avropa Komissiyası Budapeştdən, Macarıstanın xarici işlər naziri Péter Szijjártónun Avropa İttifaqı Şurasının qapalı iclasları zamanı əldə olunan həssas məlumatları mütəmadi olaraq rusiyalı həmkarı Sergey Lavrov ilə bölüşməsi ilə bağlı iddialara aydınlıq gətirməyi istəyib.

The Washington Post həftəsonu yaydığı məlumatda bildirib ki, Szijjártó Brüsseldə keçirilən Aİ iclasları zamanı Lavrovla müntəzəm əlaqə saxlayıb və fasilələr zamanı onunla ünsiyyət qurub. Bu iddialar ciddi rezonans doğurub, çünki Aİ-yə üzv dövlətlər səmimi əməkdaşlıq prinsipinə riayət etməlidir və bu cür iclasların məzmunu məxfi hesab olunur.

Macarıstan hökuməti isə iddiaları təkzib edərək onları “saxta xəbər” adlandırıb.

Avropa Komissiyasının sözçüsü jurnalistlərə bildirib: “Macarıstanın xarici işlər nazirinin guya Şuranın nazirlər səviyyəsində keçirilən qapalı müzakirələrini rusiyalı həmkarına ötürməsi ilə bağlı xəbərlər ciddi narahatlıq doğurur".

Euronews

Zəri Bayramlı