Azərbaycan Prezidenti İlham Əliyev Bişkekdə İran Prezidenti Məsud Pezeşkianla görüşüb

Azərbaycan Prezidenti İlham Əliyev Şanxay Əməkdaşlıq Təşkilatının (ŞƏT) toplantısında iştirak etmək üçün səfərdə olduğu Qırğızıstanın paytaxtı Bişkekdə İran Prezidenti Məsud Pezeşkianla görüşüb.

Azərbaycan Prezidentinin Administrasiyasının yaydığı məlumata görə, görüş ŞƏT toplantısı çərçivəsində baş tutub.

Görüş zamanı Pezeşkian İranın üzləşdiyi çətin vəziyyətdə Prezident İlham Əliyevin mövqeyinin, göstərdiyi dəstəyin, başsağlığı verməsinin, həmçinin Azərbaycanın İrana göndərdiyi humanitar yardımın İran dövləti və xalqı tərəfindən yüksək qiymətləndirildiyini bildirib. O, bütün bunlara görə İlham Əliyevə bir daha təşəkkür edib.

İran Prezidenti Azərbaycanla İran arasında münasibətlərin inkişaf etdirilməsi üçün geniş imkanların olduğunu bildirib. Pezeşkian İranın Azərbaycanla bütün sahələrdə əlaqələrin inkişafında maraqlı olduğunu qeyd edib.

Pezeşkian iki ölkə arasındakı münasibətlərin qardaşlıq və dostluq xarakteri daşıdığını vurğulayaraq, İranın bütün qonşu ölkələrlə yaxşı münasibətlər qurmaq niyyətində olduğunu bildirib.

İlham Əliyev isə İranın üzləşdiyi mövcud vəziyyətdə Azərbaycanın göstərdiyi yardımın qardaşlığın nümunəsi olduğunu deyib. Dövlət başçısı Azərbaycanın İranla bağlı yaranmış vəziyyətin sülh və danışıqlar yolu ilə həll edilməsinin tərəfdarı olduğunu vurğulayıb.

Görüşdə Azərbaycan və İran arasında müxtəlif sahələrdə əməkdaşlığın inkişaf etdirilməsi perspektivləri barədə fikir mübadiləsi aparılıb.

Mənbə: HABER GLOBAL