Xarici işlər naziri Ceyhun Bayramov Nyu-Yorkda BMT Baş Assambleyasının 81-ci sessiyası çərçivəsində ABŞ Ticarət Palatasının əsas korporativ rəhbərləri və aparıcı ABŞ şirkətlərinin nümayəndələri ilə keçirilən İcraçı Dəyirmi Masada çıxış edib.

"İnformator.az" xəbər verir ki, bu barədə Azərbaycan Xarici İşlər Nazirliyi məlumat yayıb.

Müzakirələr zamanı Azərbaycanın geostrateji əhəmiyyəti, 2025-ci ildə keçirilmiş Vaşinqton sammitindən sonra formalaşan Azərbaycan-ABŞ strateji tərəfdaşlığı, habelə ikitərəfli əlaqələrin əsas istiqamətlər üzrə daha da inkişaf etdirilməsi məsələləri müzakirə olunub.

Ceyhun Bayramov iştirakçılara Azərbaycanın xarici siyasət prioritetləri, müstəqilliyini bərpa etdikdən sonra həyata keçirdiyi addımlar və Azərbaycan-ABŞ strateji tərəfdaşlığının əsas sütunları barədə məlumat verib.

Nazir iqtisadiyyat, enerji, ticarət, rəqəmsal transformasiya, süni intellekt və bağlantı sahələrində əməkdaşlığın strateji əhəmiyyətini vurğulayıb. O, həmçinin regional proseslər və Azərbaycan-Ermənistan münasibətlərinin normallaşması barədə danışıb.

Bayramov 2025-ci ilin avqustunda imzalanmış Vaşinqton Birgə Bəyannaməsi və paraflanmış Sülh Sazişindən sonra regional normallaşma istiqamətində atılan addımları diqqətə çatdırıb. Bu çərçivədə tranzit məhdudiyyətlərinin aradan qaldırılması və Ermənistanla birbaşa ikitərəfli ticarət əlaqələrinin başlanması kimi praktiki etimad quruculuğu tədbirlərinin əhəmiyyətini qeyd edib.