"Bu gün Azərbaycan xalqı tarixinin ən şanlı və şərəfli günlərini yaşayır. Artıq qalib Azərbaycan xalqı öz əzəli Qarabağ torpaqlarının Ermənistan silahlı qüvvələri tərəfindən işğal edilməsini deyil, işğaldan azad edilməsi günlərini böyük qürur hissi ilə qeyd edir". Bu sözləri deputat Ceyhun Bayramov söyləyib.

Mövzu ilə bağlı “İnformator.az”a açıqlamasında politoloq Zeynal Əmrəliyev bildirib ki, müharibədən sonra manipulyasiya cəhdlərinin qarşısının alınması üçün cəmiyyətdə informasiya savadlılığı artırılmalıdır:

“İnsanlar emosional çağırışlara deyil, faktlara əsaslanaraq mövqe bildirməlidirlər. Dezinformasiyaya qarşı mübarizədə dövlət qurumlarının şəffaflığı və cəmiyyətin etibarlı məlumat əldə etmək imkanları mühüm rol oynayır. İnsanlar şübhəli məlumatları paylaşmazdan əvvəl onun mənbəyini yoxlamalı, rəsmi açıqlamaları və etibarlı media qurumlarının məlumatlarını müqayisə etməlidirlər. Xüsusilə, sosial şəbəkələrdə yayılan təxribat xarakterli paylaşımlara tənqidi yanaşmaq vacibdir”.

Politoloqun sözlərinə görə, tarixi həqiqətlərin gələcək nəsillərə çatdırılmasında medianın məsuliyyəti böyükdür:

“Media hadisələri faktlara, tarixi sənədlərə və etibarlı mənbələrə əsaslanaraq işıqlandırmalıdır. Məqsəd yalnız keçmişi xatırlatmaq deyil, həm də gənc nəsildə tarixi yaddaşı və milli şüuru gücləndirmək olmalıdır”.

Fidan Alışova