Enerji sektorunda innovasiyalar karbon emissiyalarının azaldılmasında mühüm rol oynayır

İqlim dəyişikliyi ilə mübarizədə əsas məqsədlərdən biri atmosferə atılan istixana qazlarının miqdarını minimuma endirmək və karbon neytrallığına nail olmaqdır. Bu prosesdə bərpaolunan enerji mənbələri ilə yanaşı, enerji sektorunda tətbiq olunan yeni texnologiyalar və innovativ həllər də mühüm əhəmiyyət daşıyır.

Mütəxəssislər enerji sistemlərinin modernləşdirilməsini də vacib hesab edirlər. Elektrik şəbəkələrinin daha çevik və dayanıqlı olması, enerjinin saxlanılması üçün batareyaların təkmilləşdirilməsi, elektrik nəqliyyat vasitələrinin yayılması və yaşıl hidrogen istehsalının genişləndirilməsi bu prosesin əsas istiqamətləri sırasındadır. Məqalədə qeyd olunur ki, “StoreDot” şirkətinin hazırladığı batareya texnologiyası elektrik avtomobilini cəmi beş dəqiqəyə tam doldurmağı hədəfləyir. Beynəlxalq Bərpa Olunan Enerji Agentliyinin (IRENA) baş direktoru Françesko La Kameranın sözlərinə görə, enerji keçidi üçün qlobal investisiyalar illik 2 trilyon dollara çatdırılmalıdır. Agentliyin hesablamalarına əsasən, bu istiqamətdə yatırımların artırılması dünya üzrə ümumi daxili məhsulun hər il 1 faiz artmasına və 5,5 milyon yeni iş yerinin yaradılmasına töhfə verə bilər. Məqalədə vurğulanır ki, karbon neytrallığına nail olmaq yalnız yeni texnologiyaların hazırlanmasından deyil, həm də onların tətbiqi üçün zəruri infrastrukturun qurulmasından və dövlət-özəl sektor əməkdaşlığından asılıdır.

Mənbə:BBC
Güllüzar Nəbili