Süni intellekt Efiopiyanın ucqar kəndlərində səhiyyə xidmətlərini gücləndirir

Efiopiyanın ucqar kəndlərində fəaliyyət göstərən tibb işçiləri süni intellekt əsaslı yeni texnologiyaların köməyi ilə xəstələrə daha düzgün və operativ yardım göstərirlər. Yeni sistemlər tibb işçilərinin qərarvermə prosesini dəstəkləsə də, əsas qərarların insan mütəxəssislər vasitəsilə verilməsi prinsipi qorunur.

2025-ci ilin əvvəlindən Efiopiyanın bəzi ərazilərində tətbiq olunan sistem iki formada işləyir. Birinci modeldə tibb işçisi mürəkkəb vəziyyətlə qarşılaşdıqda tibb bacısı, mama və ya digər mütəxəssisin çalışdığı mərkəzlə əlaqə saxlayır. Mütəxəssis məlumatları süni intellekt sisteminə daxil edir və əldə olunan tövsiyələri tibb işçisinə çatdırır. Digər modeldə isə tibb işçiləri mobil telefonları vasitəsilə mətn və ya səsli formada suallar göndərərək dərhal cavab ala bilirlər. Bununla yanaşı, “Last Mile Health” təşkilatı Hawa adlı virtual köməkçini də sınaqdan keçirir. Bu tətbiq xüsusilə kənd yerlərində çalışan tibb işçilərinin ehtiyacları nəzərə alınaraq hazırlanıb və onlara gündəlik iş zamanı həmkarları ilə ünsiyyət qururmuş kimi məlumat əldə etmək imkanı verir. Layihənin nəticələrinə əsasən, indiyədək 650-dən çox tibb işçisi bu texnologiyadan istifadə edib, süni intellekt dəstəyi ilə 6 700-dən artıq konsultasiya aparılıb. Sistemlərin fəaliyyəti zamanı toplanan məlumatlar səhiyyə xidmətlərindəki boşluqları müəyyənləşdirməyə, tibb işçilərinin təlim ehtiyaclarını aşkar etməyə və gələcəkdə tibbi tövsiyələri təkmilləşdirməyə kömək edir.

Güllüzar Nəbili

Mənbə:BBC