Müasir dövrdə regional əməkdaşlığın inkişafı, iqtisadi və ticarət əlaqələrinin genişləndirilməsi dövlətlər arasında münasibətlərin möhkəmləndirilməsində mühüm rol oynayır. Xüsusilə, dünyada baş verən hərbi-siyasi gərginliklər və qlobal nəqliyyat marşrutlarında yaranan dəyişikliklər ölkələr arasında qarşılıqlı faydalı əməkdaşlığın əhəmiyyətini artırır. Türkmənistan Prezidenti Sərdar Berdiməhəmmədov MDB ölkələrinin əməkdaşlığın inkişafı üçün bütün imkanlara malik olduğunu bildirib. 

Mövzu ilə bağlı politoloq Əziz Əlibəyli "İnformator.az"a açıqlamasında bildirir ki, MDB ölkələri arasında əməkdaşlığın gücləndirilməsi həm iqtisadi inkişaf, həm də regionda sabitliyin qorunması baxımından mühüm əhəmiyyət daşıyır:

"Türkmənistanın MDB ölkələri ilə əməkdaşlığının inkişafı regional əlaqələrin genişləndirilməsi baxımından əhəmiyyət daşıyır. Bu çərçivədə müxtəlif əməkdaşlıq formatlarının inkişaf etdirilməsi və ölkələr arasında qarşılıqlı faydalı münasibətlərin gücləndirilməsi vacibdir. Mövcud regional vəziyyət göstərir ki, iqtisadi və ticarət əlaqələrinin genişləndirilməsi, eləcə də nəqliyyat imkanlarından səmərəli istifadə dövlətlər üçün yeni imkanlar yarada bilər.

Azərbaycanın əlverişli coğrafi mövqeyi, ticarət və tranzit imkanları MDB ölkələri ilə iqtisadi əməkdaşlığın genişləndirilməsi üçün mühüm əhəmiyyət daşıyır. Dünyada və regionda baş verən hərbi-siyasi münaqişələr Azərbaycanın strateji əhəmiyyətini daha da artırıb. Qlobal təchizat zəncirində yaranan problemlər və yeni nəqliyyat-kommunikasiya marşrutlarına ehtiyac Azərbaycanın tranzit imkanlarından daha səmərəli istifadə edilməsini zəruri edir. MDB ölkələri qarşılıqlı faydalı əməkdaşlığı inkişaf etdirməklə iqtisadi əlaqələrini gücləndirə bilərlər".

Ayan Məmmədzadə