Nigeriyada 65 mindən çox şübhəli vəba hadisəsi qeydə alınıb

Nigeriyada ilin əvvəlindən bəri 65 mindən çox şübhəli vəba (xolera) hadisəsi aşkarlanıb. Epidemiya ölkənin 35 ştatına və təxminən 195 yerli idarəetmə ərazisinə yayılıb.

Nigeriya Xəstəliklərə Nəzarət və Profilaktika Mərkəzinin (NCDC) baş direktoru Cide İdris ölkədə vəba epidemiyasının gedişatı ilə bağlı vəziyyət hesabatını açıqlayıb.

İdrisin sözlərinə görə, ilin əvvəlindən 65 mindən çox şübhəli vəba hadisəsi qeydə alınıb. Xəstəlik 35 ştat və təxminən 195 yerli idarəetmə ərazisində aşkarlanıb.

O bildirib ki, ilin əvvəlində pik həddə çatan həftəlik yoluxma sayı sonrakı dövrdə əhəmiyyətli dərəcədə azalıb. Bildirilən hallar arasında ölüm nisbəti də ötən ilin eyni dövrü ilə müqayisədə ciddi şəkildə aşağı düşüb.

Bununla belə, İdris yoluxma hallarının azalmasının epidemiyanın başa çatdığı anlamına gəlmədiyini vurğulayıb.

“Həftəlik yoluxma hallarının mövsümün əvvəlində qeydə alınan pik göstəricidən sonra əhəmiyyətli dərəcədə azalması və ölüm nisbətinin ötən ilin eyni dövrü ilə müqayisədə ciddi şəkildə aşağı düşməsi ümidvericidir. Lakin epidemiyanın başa çatmadığını açıq şəkildə bildirmək istəyirəm”,-deyə o qeyd edib.

Haber Global

Güllər Gülhüseynova