Azərbaycan Prezidenti İlham Əliyevin məqsədyönlü siyasi kursu nəticəsində ölkənin ərazi bütövlüyünü bərpa etmək mümkün olub.

Bunu Özbəkistan Respublikasının Prezidenti Şavkat Mirziyoyev Azərbaycan Prezidenti İlham Əliyevlə mətbuata birgə bəyanatında deyib.

Mövzu ilə bağlı politoloq Zeynal Əmrəliyev “İnformator.az”a açıqlamasında bildirib ki, son həftələrdə regionda baş verən siyasi və iqtisadi proseslər, xüsusilə də Zəngəzur dəhlizinin açılması perspektivləri və kommunikasiya xətlərinin bərpası Cənubi Qafqazda tamamilə yeni bir geosiyasi reallıq formalaşdırmaqdadır:

“Uzun illər qapalı qalmış sərhədlərin və nəqliyyat marşrutlarının açılması istiqamətində atılan addımlar təkcə iki ölkə arasındakı münasibətlərin normallaşmasına deyil, həm də bütövlükdə Avrasiya məkanında ticarət və logistika əlaqələrinin dərinləşməsinə xidmət edir. Azərbaycanın təşəbbüsü ilə reallaşdırılan qlobalmiqyaslı nəqliyyat-infrastruktur layihələri ölkəmizin regiondakı əsas söz sahibi və strateji logistik qovşaq kimi mövqeyini qətiyyətlə möhkəmləndirir. Bu kontekstdə tranzit daşımalarının genişlənməsi qarşılıqlı iqtisadi maraqların yaranmasına, iqtisadi inteqrasiyanın sürətlənməsinə və uzunmüddətli sülh mühitinin bərqərar olunmasına mühüm zəmin yaradır. Eyni zamanda, qlobal güclərin və regional dövlətlərin bu proseslərə göstərdiyi güclü maraq Cənubi Qafqazın beynəlxalq iqtisadi sistemdəki çəkisini daha da artırır və gələcək inkişaf perspektivləri üçün geniş imkanlar açır. Bölgədə yaranan bu yeni iqtisadi mühit həm də yerli sahibkarlığın inkişafına, yeni iş yerlərinin açılmasına və investisiya axınının sürətlənməsinə əlverişli şərait yaradır. Ölkəmizin həyata keçirdiyi bu uzaqgörən siyasət gələcəkdə bütün regionun sabitliyi və rifahı üçün əsas təminat rolunu oynayacaqdır”.

Güllər Gülhüseynova