Rəhim Qədir oğlu Hüseynov

Azərbaycanın igid oğullarından biri, şəhid Rəhim Qədir oğlu Hüseynov adını Vətən tarixinin şanlı səhifəsinə qızıl hərflərlə yazdırıb. O, ömrünü torpağa deyil, torpaq uğrunda yaşayanlara miras qoyub.

Rəhim Hüseynov 1984-cü ildə Zərdab rayonunda anadan olub. Uşaqlıqdan hərbi formaya, intizama və vətən sevgisinə xüsusi maraq göstərib. Gənclik illərində bu sevgisini peşəyə çevirib və Azərbaycan Silahlı Qüvvələrində xidmətə başlayıb. O, illər boyu orduda çalışaraq, cəsarəti və peşəkarlığı ilə həm döyüş yoldaşlarının, həm də rəhbərlərinin dərin hörmətini qazanıb.

2020-ci ilin payızı-Vətən müharibəsinin alovlu günləri idi. Rəhim artıq o vaxt batalyon komandiri kimi ön cəbhədə idi. Onun rəhbərlik etdiyi bölmələr Qubadlı istiqamətində ağır, lakin həlledici döyüşlər aparıb. Rəhim döyüşçülərinə yalnız əmrlərlə deyil, nümunə ilə rəhbərlik edib. O, öndə gedir, əsgərlərinə “geri çəkilmək yoxdur” deyib.

20 oktyabr 2020-ci il… Qubadlının azadlığı uğrunda gedən amansız döyüşlərin birində Rəhim Hüseynov son nəfəsinə qədər savaşıb. Yaralı olmasına baxmayaraq, döyüş meydanını tərk etməyib, əsgərlərinə ruh verib, son anına qədər Vətənini qoruyub. O gün torpaq bir oğlunu itirib, amma bir qəhrəman qazanıb.

Onun şəhadəti təkcə ailəsi üçün yox, bütün Azərbaycan üçün böyük itki olub. Dövlət tərəfindən ölümündən sonra “Vətən uğrunda”, “Qubadlının azad olunmasına görə”, “İgidliyə görə” medalları ilə təltif edilib. NATO tərəfindən də onun ailəsinə “Şərəfli xidmət” mükafatı təqdim olunub-bu, təkcə bir zabitin yox, bütöv bir xalqın qəhrəmanlığının simvolu olub.

Bu gün Rəhim Hüseynovun adı Zərdabda, doğma kəndində, məktəblərdə və insanların qəlbində yaşayır. O, bir daha sübut edib ki, şəhidlik ölmək deyil, əbədiyyətə qovuşmaqdır.

Onun ömrü qısa olub, amma mənalı və ucalıqla dolu olub-sanki taleyi özü yazıb: “Mən torpaq üçün yaşayacağam, torpaq üçün öləcəyəm.”

Banuçiçək Məmmədova