Sığorta qeydiyyatı yalnız FİN ilə aparılacaq
Prezident İlham Əliyevin imzaladığı yeni qanunvericilik aktları sosial sığorta sisteminin müasir yanaşmalar əsasında təkmilləşdirilməsinə, sosial sığorta sahəsində prosedurların innovativ həllərlə sadələşdirilməsinə və xidmətlərin çevikliyinin artırılmasına yönəlib.
Mövzu ilə bağlı İT mütəxəssisi Elvin Abbasov “İnformator.az”a açıqlamasında bildirib ki, Fərdi İdentifikasiya Nömrəsi (FİN) üzərindən vahid qeydiyyat sisteminə keçid vətəndaşlar üçün sənədləşmə prosesini köklü şəkildə sadələşdirir:
“Əvvəllər sosial sığorta şəhadətnamələrinin (sosial kartların) fiziki olaraq alınması, itirildikdə bərpası və müxtəlif qurumlarda fərqli qeydiyyat nömrələrindən istifadə edilməsi həm vaxt itkisinə, həm də bürokratik maneələrə səbəb olurdu. Yeni qaydalarla FİN rəqəmsal açar rolunu oynayır. Vətəndaş hər hansı bir sosial xidmət üçün müraciət etdikdə əlavə sənəd təqdim etmədən, yalnız şəxsiyyət vəsiqəsi vasitəsilə bütün sığorta tarixçəsinə çıxış əldə edir. Bu, “vahid pəncərə” prinsipinin tətbiqini sürətləndirir və xidmətlərin tam rəqəmsal müstəviyə keçməsini təmin edir. Məlumatların təhlükəsizliyi və şəffaflığı baxımından FİN-ə əsaslanan sistem məlumatların dublikatlaşdırılmasını və yanlış qeydiyyat risklərini aradan qaldırır. Şəxsiyyət vəsiqələrinin mərkəzləşdirilmiş reyestri ilə inteqrasiya məlumatların manipulyasiya edilməsinin qarşısını alan güclü müdafiə qatı yaradır. Beynəlxalq şirkətlərlə qurulan sıx ünsiyyət və əməkdaşlıq çərçivəsində tətbiq edilən bu innovativ yanaşma vətəndaşlara öz sığorta vəsaitləri və işəgötürənin köçürmələri üzərində real zamanlı nəzarət imkanı verir. Bu şəffaflıq həm də vətəndaş məsuliyyətini artıraraq qeyri-rəsmi məşğulluqla mübarizədə effektiv rəqəmsal nəzarət mexanizmi formalaşdırır. Sosial sığorta sistemində bu dəyişiklik “kağızsız hökumət” konseptinə keçidin ən mühüm mərhələlərindən biridir. Yalnız FİN vasitəsilə uçot aparılması dövlət qurumları arasında məlumat mübadiləsini avtomatlaşdırır. Nəticədə pensiya və digər sosial ödənişlərin təyinatı zamanı arayış toplamaq zərurəti aradan qalxır. Sistem avtomatik olaraq FİN üzərindən şəxsin bütün iş tarixçəsini analiz edərək qərarların daha çevik və obyektiv qəbul edilməsini təmin edir. Bu islahat inzibati xərclərin azaldılmasına və dövlət xidmətlərinin müasir texnoloji standartlara uyğunlaşdırılmasına birbaşa xidmət edir”.
Aytac İbrahimova
