Süni intellekt layihələri niyə çox vaxt nəticə vermədən dayanır?

Süni intellektlə bağlı gözləntilər böyüdükcə şirkətlərin bu layihələrinə marağı da artır. Müştəri xidmətlərinin avtomatlaşdırılması, sənədlərin emalı, satış proqnozları, məlumatların təhlili və daxili proseslərin sürətləndirilməsi artıq yalnız böyük texnologiya şirkətlərinin gündəmində deyil.

Lakin süni intellekt layihələrinin bir hissəsi sınaq mərhələsindən sonra dayanır, gündəlik istifadəyə keçmir və real biznes nəticəsinə çevrilmir. Əsas problem isə çox vaxt texnologiyanın zəifliyində deyil, layihənin yanlış nöqtədən başlamasındadır.

Şirkətlər əvvəlcə “Süni intellekt tətbiq etməliyik” qərarı verir, daha sonra bu texnologiyaya uyğun problem axtarırlar. Halbuki proses əksinə qurulmalıdır. İlk olaraq konkret ehtiyac müəyyən edilməlidir: müştəri müraciətlərinə gec cavab verilir, sənədlərin işlənməsi çox vaxt aparır, satış məlumatları düzgün təhlil olunmur və ya əməkdaşlar eyni əməliyyatları hər gün əl ilə təkrarlayırlar.

Digər mühüm səbəb nəticənin əvvəlcədən ölçülə bilən formada müəyyən edilməməsidir. Süni intellekt sistemi qurulur, amma onun hansı göstəricini yaxşılaşdırmalı olduğu aydın olmur. Müştəriyə cavab müddəti nə qədər azalacaq? Şirkət neçə iş saatına qənaət edəcək? Səhvlərin sayı hansı səviyyəyə düşəcək? Satış komandası daha çox müraciət emal edə biləcəkmi?

Bu suallar cavabsızdırsa, texniki baxımdan işləyən sistem belə biznes üçün faydasız görünə bilər.

Süni intellekt layihələrinin qarşısında duran başqa bir problem də məlumatların vəziyyətidir. Şirkətdə məlumatlar fərqli proqramlarda saxlanılırsa, natamamdırsa və ya düzgün strukturlaşdırılmayıbsa, süni intellektdən dəqiq nəticə gözləmək çətinləşir. Bir çox halda layihənin əsas yükü süni intellekt modelinin hazırlanmasına deyil, məlumatların toplanmasına və təmizlənməsinə düşür.

Süni intellekt və rəqəmsal həllər üzərində çalışan Solvi hesab edir ki, uğurlu layihə böyük və bahalı sistem qurmaqla deyil, kiçik, konkret və ölçülə bilən bir problemi həll etməklə başlamalıdır. Pilot mərhələdə real nəticə əldə edildikdən sonra həll digər proseslərə də tətbiq edilə bilər.

Burada məqsəd işçini tamamilə prosesdən çıxarmaq deyil. Düzgün qurulan süni intellekt sistemi təkrarlanan işləri öz üzərinə götürməli, əməkdaşın diqqətini qərarvermə, ünsiyyət və daha vacib tapşırıqlara yönəltməlidir.

Süni intellekt şirkətdəki qarışıqlığı avtomatik aradan qaldırmır. Yanlış qurulan prosesi avtomatlaşdırmaq, sadəcə həmin yanlışlığın daha sürətli təkrarlanması deməkdir.

Buna görə də əsas sual “Süni intellektdən necə istifadə edək?” deyil,  “Süni intellekt hansı real problemimizi ölçülə bilən nəticə ilə həll edə bilər?” sualıdır.