Texnologiya ilə dərs planlaşdırma və müəllimlərin yaradıcılığı

Müasir təhsil dünyasında texnologiya artıq dərs prosesinin ayrılmaz hissəsinə çevrilib. Müəllimlər yalnız məlumat ötürən deyil, həm də yaradıcılıqla dərs planlarını hazırlayan və şagirdləri interaktiv şəkildə öyrədən pedaqoqlar kimi çıxış edirlər. Texnologiyanın istifadəsi müəllimlərin yaradıcılığını artırır, dərsləri daha maraqlı və effektiv edir.

Mövzu ilə bağlı “İnformator.az”a açıqlamasında müəllim Orxan Əlibəyov bildirib ki, texnologiya dərs planlaşdırmasını statik bir sənəddən dinamik bir prosesə çevirir:

"Onun müəllimlərə qazandırdığı əsas üstünlüklər bunlardır: müəllimlər artıq yalnız dərsliklərlə məhdudlaşmırlar. Virtual laboratoriyalar, simulyasiyalar və virtual kitabxanalar dərsin məzmununu zənginləşdirməyə imkan verir.

Hər bir şagirdin qavrama sürəti fərqlidir. Texnologiya vasitəsilə biz eyni mövzu üçün müxtəlif səviyyəli tapşırıqlar hazırlaya, şagirdlərin ehtiyaclarına uyğun fərdi öyrənmə cığırı qura bilərik. Kahoot, Quizizz və ya Padlet kimi alətlər dərsi oyunlaşdırır. Bu isə şagirdlərin dərsə cəlb olunmasını maksimuma çatdırır və planın kağız üzərində deyil, canlı şəkildə icrasını təmin edir.

Avtomatlaşdırılan qiymətləndirmə sistemləri müəllimi rutin yoxlamalardan azad edir, nəticədə müəllim öz vaxtını daha çox yaradıcı metodologiyalar üzərində düşünməyə sərf edə bilir.

Müasir texnologiyalar gələcəkdə dərs planlaşdırmanı tamamilə dəyişə bilərmi? Bəli, biz artıq bu dəyişikliyin astanasındayıq.

Gələcəkdə dərs planlaşdırma aşağıdakı istiqamətlərdə köklü transformasiyaya uğrayacaq:

Gələcəkdə süni intellekt müəllimə şagirdlərin zəif tərəflərini analiz edərək hazır tövsiyə olunan dərs planları təqdim edəcək. Planlaşdırma artıq “nəyi keçəcəyəm?” sualından “şagirdin bu boşluğunu necə dolduracağam?” sualına fokuslanacaq.

Dərs planları artıq mətnlərdən ibarət olmayacaq. Planın bir hissəsi şagirdləri qədim Misirə və ya kosmosun dərinliklərinə aparan “təcrübə ssenariləri” şəklində hazırlanacaq. Müəllim məlumatın mənbəyi deyil, öyrənmənin dizayneri və fasilitatoru olacaq. Dərs planlaşdırma bir “mühazirə ssenarisi” olmaqdan çıxıb, bir “kəşfiyyat planı”na çevriləcək.

Gövhər Mehyəddinova