Zelenski 24 nəfərin ölümü ilə nəticələnən genişmiqyaslı Rusiya hücumlarını pisləyib

Ukraynanın mərkəzi və şərq bölgələrinə gecə saatlarında endirilən zərbələr nəticəsində azı 24 nəfər həlak olub. Ukrayna Prezidenti Vladimir Zelenski hücumları Rusiyanın “ən alçaq” hücumlarından biri kimi qiymətləndirib.

Ukrayna prezidenti bildirib ki, Çerniqov vilayətinin Priluki şəhərindəki yaşayış binası çərşənbə günü 74 yaşı tamam olacaq Rusiya Prezidenti Vladimir Putinə “ad günü hədiyyəsi” kimi dağıdılıb. Zərbələr Kiyev, Dnepr, Kremençuk, Zaporojye və Aleksandriya şəhərlərinə də endirilib.

Zelenski qeyd edib ki, son 24 saat ərzində Ukrayna Rusiyanın Perm, Samara və Həştərxan vilayətlərindəki hədəflərə zərbələr endirib. O, əlavə təfərrüat vermədən “Qara dənizdə də cavab tədbiri görüldüyünü” bildirib.

Moskva hələlik son zərbələrlə bağlı heç bir şərh verməyib. Zelenski rusların “ağrılı və nümayişkaranə” zərbə endirmək istədiklərini bildirərək, hücum zamanı ümumilikdə 70 raketin atıldığını qeyd edib.

Çərşənbə günü günortadan sonra sosial şəbəkədə paylaşım edən Zelenski bildirib ki, Prilukidə beşmərtəbəli yaşayış binasına endirilən zərbə nəticəsində dördü uşaq olmaqla 18 nəfər həlak olub.

Ukraynanın Dövlət Fövqəladə Hallar Xidmətinin məlumatına görə, hücum zamanı yeddisi uşaq olmaqla 50 nəfər də xəsarət alıb. Zelenski əlavə edib ki, digər yerlərdə – Dniproda beş yaşayış binasına, Kremençukda isə dörd hündürmərtəbəli binaya dəyən raket zərbələri nəticəsində daha iki nəfər həlak olub, səkkiz nəfər yaralanıb.

O, həmçinin paytaxt Kiyevdə iki, Aleksandriyada isə daha iki nəfərin həlak olduğunu bildirib.

Ukrayna Milli Polisi internetdə Kiyev rayonlarından birinin ərazisində qaldığı iddia edilən partlamamış Rusiya istehsalı “İsgəndər” raketinin şəkillərini paylaşıb. “BBC Verify” təsvirlərin həqiqiliyini və raketə aid olduğu görünən hissələrin hündürmərtəbəli yaşayış binaları ilə əhatə olunmuş açıq əraziyə düşdüyünü təsdiqləyib.

Zelenski müttəfiqləri Ukraynaya hava hücumundan müdafiə dəstəyi paketləri təqdim etməyə yenidən çağırıb. O bildirib ki, Ukrayna hərbi qüvvələri Rusiya tərəfindən gecə saatlarında buraxılan raketlərin yalnız “bir hissəsini” vura bilib.

Zelenskinin sözlərinə görə, hücumun “əsas hədəflərindən” biri ölkənin enerji infrastrukturu olub. Moskva daha əvvəl Ukraynanın enerji obyektlərinə endirdiyi zərbələrə cavab olaraq bu cür hücumları gücləndirəcəyini bəyan edib.

Çərşənbə günü ayrı bir paylaşımda Zelenski bildirib ki, Ukrayna son 24 saat ərzində həyata keçirdiyi cavab tədbirləri çərçivəsində dörd hədəfə – o cümlədən Perm, Samara və Həştərxan bölgələrindəki iki neft obyektinə və bir təlim poliqonuna – zərbələr endirib.

Ukrayna prezidenti “Qara dənizdə də cavab tədbirləri görülür”, – deyə yazıb.

Çərşənbə axşamı axşam saatlarında Rusiyanın cənubundakı Qara dəniz sahillərində, Soçi yaxınlığında bir neft tankerini bürüyən nəhəng tüstü sütununu əks etdirən görüntülər yayılıb. Rusiya Nəqliyyat Nazirliyi daha sonra bildirib ki, pilotsuz qayıqlar Liberiya bayrağı altında üzən “Aframax Rio” neft tankerinə hücum edib. Rəsmilər heyətin xilas edildiyini bildiriblər.

Bolqarıstanın BTA xəbər agentliyinin məlumatına görə, Dəniz Administrasiyası İcraçı Agentliyinin vitse-admiralı Rumen Nikolov bildirib ki, Bolqarıstan çərşənbə axşamı pilotsuz uçuş aparatı (PUA) ilə vurulduqdan sonra batan gəminin itkin düşmüş heyət üzvlərinin axtarışını dayandırıb. Heyət üzvləri barədə ətraflı məlumat verilməyib. Nikolov gəmidə suriyalıların ola biləcəyinin ehtimal edildiyini söyləyib.

İzləmə məlumatları göstərir ki, gəmi bazar ertəsi şimala doğru hərəkət edərək Qara dənizə daxil olana qədər Bosfor boğazının cənub hissəsində lövbər salıb. “MarineTraffic” gəmi izləmə saytında qeydə alınan son mövqeyi bazar ertəsi günü Qara dənizin Bolqarıstana aid müstəsna iqtisadi zonasında, Qrinviç vaxtı ilə saat 23:43-də müəyyən edilib.

Bolqarıstanın ixtisaslaşmış “Maritime.bg” xəbər portalının məlumatına görə, “Alfa Watan” adlı gəmi PUA hücumuna məruz qalıb və Byala şəhərindən 70 dəniz mili (130 km) şərqdə batıb.

Bolqarıstanın Baş naziri Rumen Radev çərşənbə axşamı bildirib ki, mülki yük gəmisi ilə yanaşı, Bolqarıstanın müstəsna iqtisadi zonasında taxıl daşıyan ikinci bir gəmi də vurulub. İkinci gəmidəki 18 heyət üzvü xilas edilib. Bolqarıstan hücumların arxasında kimin dayandığına dair mövqeyini açıqlamayıb.

Hadisə Rusiyanın Ukraynaya qarşı müharibə çərçivəsində Qara dənizdə, xüsusilə də onun şərq hissəsində zərbələri intensivləşdirdiyi bir vaxtda baş verib.

Çərşənbə axşamı axşam saatlarında etdiyi çıxışda Zelenski hücumlara görə Rusiyanın məsuliyyət daşıdığını iddia edib. Moskva son insidentlə bağlı hələlik heç bir şərh verməyib.

BBC News

Aysu Qədirzadə