Azərbaycanda futbolun inkişafı: Yeni strategiya tələb olunur!-RƏY

Bölmə: İdman › ,
Tarix: 21:03 24.10.2024

"Azərbaycanda futbolun inkişafı ilə bağlı indiki vəziyyəti təhlil edərkən, ilk növbədə, idman infrastrukturunun vəziyyəti, uşaq futbolu üçün mövcud olan imkanlar, maddi-texniki baza, maliyyələşdirmə və klubların strukturu kimi bir çox məsələlərdə ciddi problemlərin olduğunu görmək mümkündür".

Bu sözləri "informator.az"a açıqlamasında futbol eksperti Şahin Diniyev söyləyib.

Ekspert Azərbaycan milli futbol komandasının beynəlxalq yarışlarda uğur qazanmasında çatışmayan cəhətlərdən də bəhs edib:

"Futbol inkişafının hansı bir “zəncir”ini bərpa etməyə çalışdıqda, bunun digər sahələrdə də problemlərə yol açdığını görmək mümkündür. Bu baxımdan, yalnız problemin müəyyən bir hissəsini həll etməklə ümumi sistemin işini yaxşılaşdırmaq mümkün olmur. Məsələn, təkcə futbolçuların yetişdirilməsi üçün akademiyalar yaratmaq kifayət etməz; eyni zamanda, həmin futbolçular üçün keyfiyyətli stadionlar, müasir təlim bazası, texniki avadanlıqlar, maliyyə dəstəyi, peşəkar menecment strukturları kimi digər vacib komponentlərin də mükəmməl olması tələb olunur. Bu məqamda 50%-lik düzəlişlərin kifayət etməyəcəyi və hər şeyin sıfırdan yenidən qurulmasının vacibliyi vurğulanır. Azərbaycanda uşaq futbolu, maddi-texniki baza, maliyyələşdirmə, klubların strukturu və azyaşlı futbol qruplarında mövcud olan çatışmazlıqlar sistemin zəifliyini əks etdirir. Buna görə də bu məsələlərin həlli üçün uzunmüddətli strategiya, sistem və konsepsiya tələb olunur. Futbol yalnız futbolçuların inkişafından ibarət deyil, onun ətrafında çoxsaylı əlaqəli problemlər də mövcuddur. Bu problemlərin həlli marketinq, menecment, planlaşdırma və strateji yanaşma kimi sahələri də əhatə etməlidir. Beləliklə, bütün bu sahələri əhatə edən genişmiqyaslı konsepsiya və strateji plan hazırlanmalıdır".

Şahin Diniyevin sözlərinə görə, hər bir aspekt — infrastruktur, təlim prosesi, maliyyə dəstəyi, marketinq və idarəetmə — bir-biri ilə sıx əlaqəli olmalıdır:

"Buna görə də, bütün aspektlərin qarşılıqlı əlaqəsini təmin edən sistemli bir yanaşma tətbiq edilməlidir. Bir çox ölkələrdə hər bir dövlətin öz futbol strategiyası və konsepsiyası mövcuddur və onlar bu plana uyğun hərəkət edirlər. Məsələn, Almaniya, Braziliya, Fransa, İspaniya və İtaliya kimi ölkələrin strategiyalarını nümunə götürsək, bir neçə il ərzində həmin ölkələrin futbol səviyyəsinə çatacağımızı iddia edə bilmərik. Bu, real deyil. Bizə uyğun olan ölkələrin konsepsiyasını tətbiq etməli və bu istiqamətdə geniş işlər görməliyik".

Fatimə Abdulrəhimli