Yeni futbol klubları niyə uzunömürlü olmur?
Bölmə: İdman ›
,
Tarix: 21:02 17.12.2024
"Klub yaratmaq asandır, lakin onu davamlı saxlamaq çətindir".
Bu sözləri "informator.az"a açıqlamasında futbol eksperti Ceyhun Sultanov söyləyib. Ekspert Azərbaycanda yeni futbol klublarının yaradılmasına ehtiyacın olub-olmamasından da bəhs edib:
"Yeni klubların yaradılması zəruri və vacibdir, həmçinin artmalıdır da. Bununla yanaşı, onların dayanıqlı inkişafı üçün infrastruktur və maliyyə təminatı əsas şərtlərdir. Maliyyə və infrastruktur olmadan hər gün yeni komandalar yaradılsa da, onların qısa müddətdə dağılması qaçınılmazdır. Bu gün orta sahibkarlar tərəfindən balaca futbol klubları yaradılır, lakin bu, uzunmüddətli perspektivdə nəticə vermir. Belə klubların olması əvəzinə olmaması daha məqsədəuyğun hesab edilir. Köklü klubların yaradılması və idarə olunması dövlət tərəfindən həyata keçirilməli, müvafiq nəzarət mexanizmləri tətbiq edilməlidir. Plansız və qısa müddətli fəaliyyət üçün yaradılan klubların mövcudluğu məqsədəuyğun deyil".
Ceyhun Sultanovun sözlərinə görə, hər bir rayonun öz klubu olmalıdır və bu klublar dayanıqlı maliyyə təminatına malik olmalıdır:
"Hər şey ölçülüb, biçilməli və uzunmüddətli planlara əsaslanmalıdır. Hər bir rayonda sabit və dayanıqlı futbol klublarının yaradılması arzuolunandır. Azarkeş kütləsi də belə klublarla formalaşa bilər. Lakin, belə klubların sırf qısa müddətli fəaliyyət üçün deyil, uzunmüddətli inkişaf strategiyasına əsaslanaraq qurulması vacibdir".
Fatimə Abdulrəhimli
