Qazaxıstan altı yeni qorunan ərazi yaradacaq

Bölmə: Dünya › ,
Tarix: 21:14 26.06.2025

Qazaxıstan biomüxtəlifliyin qorunması istiqamətində ciddi addımlar atır. Ekologiya və Təbii Sərvətlər Nazirliyinin iyunun 23-də yaydığı məlumata görə, ölkədə altı yeni xüsusi qorunan təbiət ərazisi yaradılacaq. Bu təşəbbüs, ümumi ölkə ərazisinin 12,5 faizini qorunan ərazi kimi tanımağı hədəfləyən genişmiqyaslı planın bir hissəsidir.

 

Yeni ekoloji institutların yaradılması, Qazaxıstanın Qırmızı Kitabında yer alan nadir heyvan və bitki növlərinin qorunmasına xidmət edəcək. Bununla yanaşı, hökumət üç mövcud qoruğun – Ustyurt Dövlət Təbiət Qoruğu, Akjayik Qoruğu və Xəzər Dəniz Foku Qoruğunun – ərazisinin genişləndirilməsini də planlaşdırır.

 

Bu təşəbbüslər hazırda hazırlanmaqda olan "2025–2035-ci illər üçün Biomüxtəlifliyin Mühafizəsi və Davamlı İstifadəsi Konsepsiyası" layihəsində əksini tapıb. Konsepsiya, genetik resurslardan əldə edilən faydaların ədalətli bölüşdürülməsi ilə yanaşı, biomüxtəlifliyin qorunması və davamlı istifadəsini təmin etməyi nəzərdə tutur. Sənəd, Qazaxıstanın beynəlxalq ekoloji öhdəliklərinə sadiqliyini də nümayiş etdirir.

 

Layihə, qarşıdakı onillik üçün ölkənin milli fəaliyyət planının əsasını təşkil edəcək və ekosistemlərin və təbii irsin mühafizəsi üzrə prioritetləri və tədbirləri müəyyən edəcək.

 

ANEWZ

Gülhüseynova Güllər