"Red Bull Racing" maşınlarını təkmilləşdirməlidir!
![](/sekil.php?w=450&h=0&zc=1&src=/upload//202407/2626883_1.jpg)
Tarix: 11:21 25.07.2024
Helmut Marko Red Bull-un Macarıstan Qran Prisinə gətirdiyi yeniləmələrin istədikləri nəticəni vermədiyini və bu səbəbdən Maks Verstappenin həqiqətən qəzəbləndiyini bildirib.
Verstappen Macarıstandakı yarışı 2021-ci il mövsümünün sonundan bəri ilk dəfə ardıcıl üç yarış qazana bilməyib, O, həmçinin podiumun son pilləsi uğrunda mübarizə apararkən yarışın son dövrələrində Lyuis Hamiltonla təmasda olub.
Verstappen yarışdan sonra etiraf etdi ki, o, komandasının strategiya seçimindən və Macarıstan Qran Prisi boyu RB20 sürmək hissindən məyus olub.
Hollandiyalı pilot yarışdan sonra onu tənqid edənlərə də sərt cavablar verib. Marko etiraf edib ki, Hunqarorinqdəki hadisələrdən sonra Verstappenin əhval-ruhiyyəsi heç də yaxşı deyil.
Macarıstan Qran Prisindən sonra Marko deyib: "Maks həqiqətən qəzəblidir".
"Biz əhval-ruhiyyəni normal vəziyyətə gətirməliyik: avtomobilimiz yenidən təkmilləşməlidir. Təəssüf ki, yeniləmələr istədiyimiz nəticəni vermədi" dedi.
Bu yaxınlarda Markonun "Red Bull Racing"-dəki gələcəyinə aydınlıq gəlib. Marko ən azı 2026-cı ilin sonuna qədər "Red Bull Racing"-də olacaq.
Marko bildirib ki, komanda yenə də Verstappeni qələbələrə aparacaq avtomobil dizayn etməlidir.
"İndi hər şey maşının yenidən işlənməsi və Maksa yaxşı maşın verilməsidir. Sonra o, yenə sakitləşəcək.
O, Formula 1-in ən yaxşı sürücüsüdür, boliddə fərq yaradandır. O, bilir ki, biz bunu bilirik".
Mənbə: Motorsport
Məhəmməd Qasımov