"Belə getsə, sosial medianın inkişafı üçün hüquqi çərçivələr vacib olacaq"-ŞƏRH

Bölmə: MEDİA › ,
Tarix: 18:09 03.04.2025

Müasir dünyada sosial media təkcə ünsiyyət vasitəsi deyil, həm də insanların öz fikirlərini ifadə etdiyi, məlumat paylaşdığı və cəmiyyətə təsir göstərdiyi bir platformaya çevrilib. İfadə azadlığı sosial medianın əsas dəyərlərindən biri olsa da, son illərdə bu azadlığın hüdudları geniş müzakirə olunur. Bəzi ölkələrdə senzura və məhdudiyyətlər tətbiq edildiyi halda, bəzi platformalar dezinformasiyanın və nifrət nitqinin yayılmasının qarşısını almaq üçün müxtəlif qaydalar müəyyənləşdirir.

Bu barədə “informator.az”a danışan Yeni media üzrə tədqiqatçı Səbinə İzzətli deyir ki, sosial media şirkətləri isə istifadəçilərin ifadə azadlığını qorumaq və eyni zamanda zərərli məzmunun qarşısını almaq kimi çətin seçimlə mübarizə aparmalı olurlar:

“Görünən odur ki, sosial media və söz azadlığı məsələləri daha çox qanunlarla tənzimlənəcək və platformaların mövcud qaydaları dəyişəcək. Müxtəlif dövlətlər dezinformasiya, nifrət nitqi və təhlükəli məzmunun yayılmasını məhdudlaşdırmaq üçün yeni qaydalar tətbiq edir. Lakin bu, bəzi hallarda senzura riskini də artırır. Süni intellekt texnologiyaları bu prosesi sürətləndirsə də, bəzi hallarda yanlış və qərəzli qərarlara yol aça bilir".

Tədqiqatçının sözlərinə görə, senzura narahatlığına görə bəzi insanlar mərkəzləşdirilməmiş sosial şəbəkələrə və alternativ platformalara üstünlük verməyə başlayırlar:

“Blokçeyn əsaslı və Mastodon kimi platformalar istifadəçilərə daha çox azadlıq versə də, bu, nəzarətsiz və təhlükəli məzmunun yayılmasına da səbəb ola bilər. Belə getsə, sosial medianın inkişafı üçün şəffaf qaydalar, etik süni intellekt və həm söz azadlığını, həm də ictimai təhlükəsizliyi qoruyan hüquqi çərçivələr vacib olacaq".

Nurcan İsmayılova