Azərbaycanda superkubok bərpa oluna bilər?-RƏYLƏR
Bölmə: İdman ›
,
Tarix: 17:08 01.08.2024
Azərbaycan Superkuboku — kubok 4 dəfə — 1993, 1994 və 1995-ci illərdə — "Səhər" qəzetinin Superkuboku adı ilə keçirilib. 2013-cü ildə isə Azərbaycan Superkuboku adı ilə yenidən bərpa edilib. Qalib iki dəfə "Neftçi Bakı", bir dəfə isə "Qarabağ" və "Xəzər-Lənkəran" olub.
Bəs, 2013-cü ildən bəri keçirilməyən bu turnir yenidən bərpa oluna bilərmi? Bu turnirin 11 ildi keçirilməməsinin əsas səbəbi nədir?
Məsələ ilə bağlı Azərbaycan Peşəkar Futbol Liqasının media və marketinq direktoru Sənan Abdullayev "informator.az"a açıqlamasında turnirin keçirilməməsindəki məqamlardan bəhs edib:
"Düzü, bu barədə danışılıb. Biz də keçirilməsini çox istəyirik, amma təqvim baxımından superkubokda iştirak edəcək komandaların həmin zamanda avrokubok oyunları olduğuna görə bu da sıxlıq yaradır və bu oyuna klubların özləridə ciddi yaraşmırlar. Biz(AzPfl) bu yarışın ciddi və rəqabətli bir yarış olmasını istəyirik, amma indiki vəziyyətdə oyun olsa belə klublar bu oyunlarda ehtiyat qüvvələri ilə mübarizə aparacaqları üçün maraqsız və sadəcə keçirilmək xatirinə təşkilatçılıq olacağı üçün biz bunu istəmirik".
Futbol eksperti Aslan Kərimliyə görə isə bunun iki səbəbi var, biri Azərbaycanda futbola marağın azalması digəri isə maliyyədir:
"Son dövrlər superkubokunun keçirilməməsinə təsir edən faktor, futbolun populyarlığının aşağı düşməsidir, həmçinin də maliyyə sıxıntılarıdır.Bir müddət qərar qəbul olundu ki, klubların sponsorları vergilərdən müəyyən qədər azad olurdu. Amma ondan sonra sponsorların investisiyası azaldı. Digər səbəblərdən biri isə klubların səviyyəsinin aşağı düşməsi və çempionatda rəqabətin azalmasıdır".
Hüseyn İlyasov
